অনিদিৰ্ষ্ট কাললৈ বন্ধ কলঘৰ : ভাৰতীয় টি ব’ৰ্ডক জগৰীয়া বটলিফ ফেক্টৰী মালিকৰ - Assam Tea Industry

বিশ্বনাথ, 1 জুন : 1 জুনৰ পৰা ৰাজ্যজুৰি বন্ধ হৈছে বটলিফ ফেক্টৰীসমূহ ৷ 2015 চনতে ভাৰতীয় টি ব’ৰ্ডে ৰাজ্যৰ বটলিফ ফেক্টৰীসমূহলৈ নিষিদ্ধ তথা অত্যাধিক কীটনাশক ব্যৱহাৰ নোহোৱা কেঁচা চাহপাত সংগ্ৰহ কৰাৰ লগতে চাহ নিলাম কেন্দ্ৰৰ জৰিয়তে শুকান চাহ বিক্ৰী কৰিবলৈ নিৰ্দেশ জাৰি কৰিছিল ৷ এই নিৰ্দেশনাৰ পিছতে জাঙুৰ খাই উঠিছিল বটলিফ ফেক্টৰী মালিকসকল ৷ এই ব্যৱস্থা তেওঁলোকৰ হিতৰ বিপৰীতে সেয়েহে এই নিৰ্দেশনা উঠাই নোলোৱা পৰ্যন্ত ফেক্টৰীসমূহ বন্ধ ৰখাৰ সিদ্ধান্ত লয় বটলিফ ফেক্টৰীৰ মালিকসকলে ৷

আনহাতে বন্ধ হোৱাৰ ফলত ৰাজ্যত প্ৰতিদিনে প্ৰায় চাৰিশৰো অধিক বটলিফ ফেক্টৰীয়ে প্ৰায় 21 লাখ কেজিৰো অধিক চাহ উৎপাদন কৰাৰ পৰা বিৰত থাকিব ৷ ইফালে এই সিদ্ধান্তৰ ফলত 5 শতাংশ জি এছ টি হাৰে প্ৰতিদিনে প্ৰায় 10 লাখৰো অধিক কৰ হেৰুৱাব লগা হ’ব ৰাজ্য চৰকাৰে ৷ ইফালে প্ৰায় এক কোটিৰো অধিক কেঁচা চাহপাত নষ্ট হ’ব ক্ষুদ্ৰ চাহ খেতিয়কৰ ৷ চৰকাৰ তথা টি ব’ৰ্ডৰ গাফিলতিৰ বাবে ক্ষুদ্ৰ চাহ খেতিয়কৰ লগতে ইয়াত নিয়োজিত হৈ থকা শ্ৰমিক সকলৰ এতিয়া পানীত হাঁহ নচৰা অৱস্থাৰ সৃষ্টি হৈছে ৷

বটলিফ ফেক্টৰীৰ মালিক তথা উত্তৰ অসমৰ বিশ্বনাথ জিলাৰ সাধাৰণ সম্পাদক লক্ষী ভড়ালীয়ে ই টিভি ভাৰতৰ আগত চৰকাৰ তথা ভাৰতীয় টি ব’ৰ্ডক দোষাৰোপ কৰি কয় যে যেতিয়ালৈকে কেঁচা চাহপাতৰ গুণাগুণৰ পৰিমাপ কৰিব পৰা যন্ত্ৰৰ ব্যৱস্থা নকৰে তেতিয়ালৈকে কলঘৰসমূহ বন্ধ ৰখাৰ সিদ্ধান্ত লোৱা হৈছে ৷ লগতে যেতিয়ালৈকে এই সুবিধা প্ৰদান নকৰে তেতিয়ালৈকে পুৰণি ব্যৱস্থাপনাৰে কলঘৰ সমূহ চলাই নিয়াৰ বাবে চৰকাৰে সিদ্ধান্ত গ্ৰহণ কৰিবলৈ দাবী জনায় বটলিফ ফেক্টৰী মালিক সন্থাই ৷

আনহাতে ক্ষুদ্ৰ চাহ খেতিয়ক সকলে বটলিফ ফেক্টৰীৰ মালিক আৰু টি ব’ৰ্ডক দোষাৰোপ কৰি কয় যে তেওঁলোকৰ উপযুক্ত কৌশলগত অৰ্হতা নথকাৰ ফলত এই পৰিস্থিতিৰ উদ্ভৱ হৈছে ৷ লগতে ফেক্টৰীৰ মালিক আৰু টি ব’ৰ্ডক ক্ষুদ্ৰ চাহ খেতিয়কসকলক প্ৰশিক্ষণ তথা উপযুক্ত পৰিচালনাৰ ব্যৱস্থাপনা নিৰ্ধাৰণ কৰিবলৈ দাবী জনায় ৷

লগতে পঢ়ক : চৰকাৰৰ বিৰুদ্ধে ক্ষোভ বটলিফ চাহ নির্মাতা সন্থাৰ; আজিৰে পৰা ফেক্টৰীয়ে নলয় কেঁচা চাহপাত - TEA BOARD