গুৱাহাটী, ৯ ছেপ্টেম্বৰ:এটা সপোনৰ যেন সমাধি ঘটিল । অশ্ৰু আৰু বিষাদৰ মাজত ভাঁহি আহিল এটা শব্দ, পৰিমিতা আৰু নাই। আঠখেলীয়া নামঘৰত শৰাই দি মাজুলিলৈ উভতাৰ সময়ত নিমাতীঘাটৰ অভিশপ্ত ফেৰীখনত উঠিছিল এগৰাকী মেধাৱী ছাত্ৰী তথা সুযোগ্য শিক্ষয়িত্ৰী পৰিমিতা দাস ।
কিছুসময় আগলৈ মাতৃৰ সৈতে হাঁহি মাতি থকা পৰিমিতাই হয়তো ভৱা নাছিল মৃত্যুয়ে হয়তো অপেক্ষা কৰি আছে তেওঁৰ বাবে । মাত্ৰ কেইটামান সময়ৰ ব্যৱধান । তাৰ পিছত সকলো শেষ । পাৰলৈ তুলি অনা হ'ল এটা নিষ্প্ৰাণ শৰীৰ । চিৰদিনৰ বাবে শেষ হৈ গ'ল এটা পৰিয়ালৰ আশা-প্ৰত্যাশা ।
নিমাতীঘাটতৰ ফেৰী দুৰ্ঘটনাত প্ৰাণ হেৰুওৱা ৰঙাচাহী মহাবিদ্যালয়ত অসমীয়া বিভাগৰ সহকাৰী অধ্যাপিকা হিচাপে চলিত বর্ষত নিযুক্তি লাভ কৰা পৰিমিতা দাসে । মহানগৰীৰ কাহিলীপাৰাৰ পৰিমিতা আছিল অত্যন্ত অমায়িক-সৰলমনা । নুনমাটিস্থিত অসম জাতীয় বিদ্যালয়ৰ এসময়ৰ ছাত্ৰী আছিল পৰিমিতা ।
লগতে পঢ়ক:কৰ্তব্যত গাফিলতি কৰি তাচ পাত খেলে IWT ৰ বিষয়াই : শংকৰ জ্যোতি বৰুৱা
এই কথা পোহৰলৈ অহাৰ পিছত বিদ্যালয়খনত অধ্যয়ন কৰা একালৰ সতীৰ্থই পৰিমিতাক হেৰুৱাৰ বেদনাত এতিয়া শোকত ভাগি পৰিছে । আনকি পৰিমিতা দাসৰ মৃত্যৰ খবৰ বিয়পি পৰাৰ পিছত এক শোকাকুল পৰিবেশে বিৰাজ কৰিছে অসম জাতীয় বিদ্যালয়ৰ চৌহদতো ।