হোজাই,২২ জুন:হোজাই জিলাৰ যমুনামুখ সমষ্টিৰ শিক্ষিত যুৱক-যুৱতীসকলৰ দক্ষতা বিকাশ আৰু সংস্থাপনৰ সহায় হোৱাকৈ সমষ্টিটোৰ নৱ নিৰ্বাচিত বিধায়ক চিৰাজুদ্দিন আজমলে এটি প্ৰশংসনীয় পদক্ষেপ হাতত লৈছে ৷
বিধায়কজনে যমুনামুখ সমষ্টিৰ পাঁচটা স্থান ডবকা, নীলবাগান,যমুনামুখ, মোৰাঝাৰ আৰু চৌধুৰী বজাৰত স্নাতক আৰু উচ্চতৰ মাধ্যমিক উত্তীৰ্ণ ছাত্ৰ ছাত্ৰীৰ বাবে ব্যৱহাৰিক ইংৰাজী ভাষা জ্ঞান আৰু লিখা মেলাৰ তিনিমহীয়া প্ৰশিক্ষণ কেন্দ্ৰ স্থাপনৰ সিদ্ধান্ত লৈছে ৷ সেই সিদ্ধান্তৰ বাস্তবায়নৰ দিশত প্ৰথমটো খোজ হিচাপে মঙলবাৰে বিধায়ক চিৰাজুদ্দিন আজমলে ডবকাত প্ৰথমটো আজমল ইনষ্টিটিউট অব কমিউনিকেচন স্কীল্চ (Ajmal Institute of Communication Skills) আনুষ্ঠানিকভাৱে মুকলি কৰে ৷
এই অনুষ্ঠানত মৰ্কজুল মা আৰিফৰ (Markazul Ma'arif) কাৰ্যবাহী সভাপতি ড° চামছুল হক চৌধুৰী, জ্যেষ্ঠ উপ-সভাপতি অধ্যাপক (অৱসৰপ্ৰাপ্ত) ৰছিদ আহমদ, সাধাৰণ সম্পাদক খলিলুৰ ৰহমান লস্কৰ, আজমল ফাউণ্ডেচনৰ(Ajmal Foundation) ডাইৰেক্টৰ ড° খচৰুল ইছলাম, উক্ত প্ৰকল্পৰ চিলেবাচৰ প্ৰণেতা তথা শিক্ষকসকলৰ প্ৰশিক্ষক অধ্যাপক (অৱসৰপ্ৰাপ্ত) ড° আৰ কে ৰথ আৰু বিধায়কৰ সচিব নুৰুল হক বৰভূঞা উপস্থিত থাকে ৷ আজমল চিএছআৰৰ(CSR) অগ্ৰণী স্বেচ্ছাসেৱী সংস্থা মৰ্কজুল মা' আৰিফে ৰূপায়ণ কৰিবলগা এই পাচোঁটা কেন্দ্ৰ সম্পৰ্কে বিধায়কজনে কয় যে স্নাতক আৰু উচ্চতৰ মাধ্যমিক উত্তীৰ্ণ শিক্ষাৰ্থীৰ কেৰিয়াৰৰ সম্ভাৱনা বৃদ্ধি কৰাৰ লগতে নাৰী সৱলীকৰণ আৰু উলামাসকলৰ কৰ্মসংস্থাপনৰ উন্নয়ন এই প্ৰকল্পৰ মূল উদ্দেশ্য ৷ পঢ়াশুনাৰ অন্তত যিসকল চাকৰিৰ সন্ধানৰত আৰু বিভিন্ন সন্মানজনক কৰ্মসংস্থাপনত যিসকলে নিজকে জড়িত কৰিবলৈ আগ্ৰহী, যমুনামুখ সমষ্টিৰ সেই উচ্চাকাংক্ষী যুৱক-যুৱতী এই প্ৰকল্পৰ দ্বাৰা অত্যন্ত ফলপ্ৰসূ হ'ব ৷