দুৰ্নীতিগ্ৰস্ত বিষয়াৰ কাহিনী চিৰাং, 10 জানুৱাৰী :মুখ্যমন্ত্ৰীৰ দুৰ্নীতিমুক্ত অসম গঢ়াৰ যি প্ৰচেষ্টা, সেয়া যেন সপোন হৈয়ে ৰ’ব ৷ নিতৌ গ্ৰেপ্তাৰ হৈ থকা দুৰ্নীতিগ্ৰস্ত বিষয়া-কৰ্মচাৰীৰ তালিকা বাঢ়িয়ে গৈ আছে । বছৰটোৰ আৰম্ভণিতে মঙলবাৰে নিশা দুৰ্নীতি নিবাৰণ শাখাৰ জালত পৰিল চিৰাং জিলাৰ কাজলগাঁও থানাৰ অন্তৰ্গত ঢালিগাঁও টাউন আউটপোষ্টৰ ভাৰপ্ৰাপ্ত বিষয়া চিন্টু দাস ।
চিৰাং আৰক্ষীক চেকা লগাই উৎকোচ লৈ হাতে-লোটে দুৰ্নীতি নিবাৰণ শাখাৰ হাতত গ্ৰেপ্তাৰ হয় আৰক্ষী বিষয়াজন । জানিব পৰা মতে, কোকৰাঝাৰ জিলাৰ ফকিৰাগ্ৰামৰ সাপটগ্ৰাম নিবাসী এটা পৰিয়ালে নিজৰ বাহন হেৰোৱা সন্দৰ্ভত বিগত 21 ডিচেম্বৰত গোচৰ ৰুজু কৰিবলৈ আহিছিল ঢালিগাঁও আৰক্ষী চকীলৈ । পৰিয়ালটোৰ এজাহাৰ লৈয়ো পঞ্জীয়ণ নকৰাকৈ ধন দাবীৰে হাৰাশাস্তি কৰিছিল তেওঁলোকক আৰক্ষী বিষয়াজনে । পৰিয়ালটোক ডেৰ লাখ টকা উৎকোচ দাবী কৰিছিল আৰক্ষী বিষয়া চিন্টু দাসে ।
তাৰ পিচতে ভুক্তভোগী পৰিয়ালটো কাষ চাপিছিল দুৰ্নীতি নিবাৰণ শাখাৰ । মঙলবাৰে নিশা দাবী কৰা উৎকোচৰ দহ হেজাৰ টকা লওতেই হাতে-লোটে দুৰ্নীতি নিবাৰণ শাখাই গ্ৰেপ্তাৰ কৰে আৰক্ষী বিষয়া চিন্টু দাসক । নিশা 1 বজালৈ চলে দুৰ্নীতি নিবাৰণ শাখাৰ অভিযান আৰু তাৰ পিচতে দুৰ্নীতিগ্ৰস্ত আৰক্ষী বিষয়াজনক তেওঁলোকে লৈ যায় গুৱাহাটীলৈ । এই গ্ৰেপ্তাৰ সন্দৰ্ভত চিৰাং আৰক্ষীয়ে বৰ্তমানলৈকে মুখ খোলা নাই । একেদৰে দুৰ্নীতি নিবাৰণ শাখাইয়ো সংবাদ মাধ্যমক কোনো তথ্য সদৰী কৰা নাই ।
চিৰাং আৰক্ষীৰ জিলা সদৰ অতিৰিক্ত আৰক্ষী অধীক্ষক (অপৰাধ) শ্বেখৰজ্যোতি ৰায় ঘটনাস্থলীত উপস্থিত থাকে যদিও আৰক্ষী অধীক্ষকে জনাব বুলি কৈ সংবাদ মাধ্যমৰ পৰা আঁতৰি আহে । দুৰ্নীতি নিবাৰণ শাখাৰ ধাৰাবাহিক অভিযানৰ পিচতো যেন দুৰ্নীতিগ্ৰস্ত বিষয়া-কৰ্মচাৰীৰ দুৰ্নীতি দমন কৰিব পৰা নাই চৰকাৰখনে । এজনৰ পিচত আনজন বিষয়া কৰ্মচাৰী গ্ৰেপ্তাৰ হৈয়ে আছে ।
লগতে পঢ়ক :বৰপেটাত উৎকোচ লৈ হাত দাঙিলে জলসিঞ্চন বিভাগৰ কাৰ্যবাহী অভিযন্তাই
