জনীয়াত বেঁকী নৈৰ খহনীয়াৰ তাণ্ডৱ

কলগাছিয়াৰ সুঁতিৰপথাৰ গাঁৱত অব্যাহত বেঁকী নৈৰ ব্যাপক গৰাখহনীয়া ৷ মানচিত্ৰৰ পৰা নিশ্চিহ্ন হোৱাৰ পথত সুঁতিৰপথাৰ গাঁও ৷

জনীয়া, ৮ জুনঃ জনীয়া বিধানসভা সমষ্টিৰ মাজেৰে বৈ যোৱা বেঁকী নৈৰ গৰাখহনীয়াই নিদ্ৰাহৰণ কৰিছে নৈপৰীয়া ৰাইজৰ । বৰডাংগা, কামাৰপাৰা, কৰাৰকুৰত অব্যাহত আছে বেঁকী নৈৰ খহনীয়া । বেঁকীনৈৰ এই খহনীয়াই সম্প্ৰতি নিদ্ৰাহৰণ কৰিছে কলগাছিয়া ৰাজহ চক্ৰৰ অন্তৰ্গত সুঁতিৰপথাৰ গাঁৱৰ ৰাইজৰ । বিগত চাৰি বছৰ ধৰি হৈ থকা খহনীয়াৰ ফলত এখন বিদ্যালয়, সুঁতিৰপথাৰ বজাৰকে ধৰি সহস্ৰাধিক পৰিয়ালৰ ঘৰ-বাৰী ইতিমধ্যেই বেঁকী নৈৰ বুকুত জাহ গৈছে । কিন্তু বিগত কেইদিনমানৰ পৰা বেঁকী নৈয়ে ৰুদ্ৰমূৰ্তি ধাৰণ কৰি প্ৰত্যেক দিনাই নৈখনৰ বুকত জাহ যাবলৈ ধৰিছে বিঘাই বিঘাই মাটি ।

যাৰ বাবে সুঁতিৰপথাৰ গাঁওখনৰ লগতে সহস্ৰাধিক পৰিয়াল আৰু এখন প্ৰাথমিক বিদ্যালয় বেঁকী নৈৰ বুকুত জাহ যোৱাৰ আশংকাত শংকিত হৈ পৰিছে ৰাইজ । বিগত কেইবাবছৰ ধৰি এই গাঁওখন খহনীয়াৰ কৱলত পৰিছে যদিও স্থানীয় বিধায়ক, সাংসদ, বৰপেটা জিলা প্ৰশাসনে এই গৰাখহনীয়া প্ৰতিৰোধৰ বাবে কোনো ব্যৱস্থা গ্ৰহণ কৰা নাই । সেয়ে অসম চৰকাৰক বেঁকী নৈৰ খহনীয়া প্ৰতিৰোধ কৰি সুঁতিৰপথাৰ গাঁওখন ৰক্ষা কৰাৰ বাবে দাবী উত্থাপন কৰিছে স্থানীয় ৰাইজে ।