স্পৰ্টছ ডেস্ক, ২৬ ডিচেম্বৰ : দক্ষিণ আফ্ৰিকাৰ চেঞ্চুৰিয়ান পাৰ্কত মঙলবাৰে ভাৰত আৰু দক্ষিণ আফ্ৰিকাৰ মাজত অনুষ্ঠিত হ'বলগীয়া প্ৰথম টেষ্টৰ টছ সিক্ত আউটফিল্ডৰ বাবে বিলম্ব হৈছে । "দক্ষিণ আফ্ৰিকা আৰু ভাৰতৰ মাজত অনুষ্ঠিত হ'বলগীয়া প্ৰথম টেষ্টৰ টছ আৰু মেচৰ আৰম্ভণি সিক্ত আউটফিল্ডৰ বাবে ৰলম হৈছে । পুৱা ১০ বজাত (ভাৰতীয় সময় মতে ১.৩০ বজাত) খেলপথাৰৰ পৰৱৰ্তী পৰিদৰ্শন হ'ব ।" মঙলবাৰে ভাৰতীয় ক্ৰিকেট নিয়ন্ত্ৰণ বোৰ্ডে এক্স পোষ্টত কয় ।
উল্লেখ্য যে মেঘাচ্ছন্ন বতৰৰ বাবে ইতিমধ্যে এই টেষ্টৰ সময়ত বৰষুণৰ পূৰ্বাভাস দিয়া হৈছে । ভাৰতে মঙলবাৰে চেঞ্চুৰিয়ানত অনুষ্ঠিত হ'বলগীয়া প্ৰথমখন টেষ্টৰ জৰিয়তে দক্ষিণ আফ্ৰিকা ভ্ৰমণৰ ৰঙা বলৰ শংখলা আৰম্ভ কৰিব । টি-২০ শৃংখলা ১-১ ব্যৱধানত ড্ৰ হোৱাৰ পিছত ভাৰতে এদিনীয়া শৃংখলা ২-১ ব্যৱধানত হস্তগত কৰে । ইয়াৰ পিছত মেন ইন ব্লুৱে দক্ষিণ আফ্ৰিকাত তেওঁলোকৰ প্ৰথমখন টেষ্ট শৃংখলা জয়ৰ লক্ষ্য ৰাখিব ।
আইচিচি ক্ৰিকেট বিশ্বকাপৰ ফাইনেলত অষ্ট্ৰেলিয়াৰ হাতত পৰাস্ত হোৱাৰ পিছত ৰোহিত শৰ্মা, বিৰাট কোহলী আৰু যশপ্ৰীত বুমৰাহৰ দৰে জ্যেষ্ঠসকলৰ ওপৰত এইটো হৈছে প্ৰথম আন্তঃৰাষ্ট্ৰীয় দায়িত্ব । আনহাতে, প্ৰাক-মেচ সংবাদমেলত ৰোহিত শৰ্মাই কয় যে ভাৰতীয় ছীমাৰসকলে বিদেশত তেওঁলোকৰ প্ৰদৰ্শনৰ দ্বাৰা বিগত পাঁচৰ পৰা সাত বছৰত যথেষ্ট সন্মান অৰ্জন কৰিছে । লগতে তেওঁ কয় যে যদিও আঘাতৰ বাবে শ্বামীৰ অনুপস্থিতি অনুভৱ কৰা হ'ব, দলটোৰ বাকী বলাৰসকলৰ ওপৰত তেওঁৰ আস্থা আছে ।
"আমাৰ ছীমাৰসকলে সেই সন্মান অৰ্জন কৰিছে, কাৰণ তেওঁলোকে বিদেশৰ পৰিস্থিতিত কেনে প্ৰদৰ্শন কৰিব লাগে সেয়া জানে । বিগত পাঁচৰ পৰা সাত বছৰ ধৰি তেওঁলোকে অষ্ট্ৰেলিয়া, ইংলেণ্ড আৰু দক্ষিণ আফ্ৰিকাত ভাল প্ৰদৰ্শন কৰিছে । আনকি দক্ষিণ আফ্ৰিকাতো আমি যোৱা বছৰ প্ৰথম টেষ্টত জয়লাভ কৰিছিলোঁ । কিন্তু পৰৱৰ্তী দুখন মেচত পৰাস্ত হওঁ । তেওঁলোকে নিজৰ সৰ্বোচ্চ উজাৰি দিছে আৰু আমি তেওঁলোকৰ পৰা যি আশাকৰোঁ সেয়া আমাক দিছে । শ্বামী আমাৰ বাবে এক ডাঙৰ অভাৱ হ'ব । তেওঁৰ অভিজ্ঞতা আৰু তেওঁ আমাৰ দলৰ বাবে বহু বছৰ ধৰি সুন্দৰ প্ৰদৰ্শন কৰিছে । কোনোবাই তেওঁৰ স্থান পূৰণ কৰাটো সহজ নহ'ব । কিন্তু তেওঁৰ স্থানত যি আহিব তেওঁৰ ওপৰত আমাৰ যথেষ্ট আত্মবিশ্বাস আছে ।" ৰোহিতে কয়।