স্প’ৰ্টছ ডেস্ক, 13 অক্টোবৰ: শনিবাৰে মোটেৰাত পাকিস্তানৰ বিৰুদ্ধে অনুষ্ঠিত হ’বলগীয়া বিশ্বকাপৰ হাই ভল্টেজ খেলখনত অসুস্থ ছুপাৰ ষ্ট্ৰাইকাৰ শুভমান গিলে দলটোত যোগদান কৰাৰ সম্ভাৱনা প্ৰবল । ‘‘তেওঁ ৯৯ শতাংশ নিশ্চিত । আমি কাইলৈ চাম ।’’ শুকুৰবাৰে নৰেন্দ্ৰ মোডী ষ্টেডিয়ামত অনুষ্ঠিত হোৱা সংবাদমেলত এইদৰে কয় অধিনায়ক ৰোহিত শৰ্মাই ।
বৃহস্পতিবাৰে এঘণ্টা ধৰি নিজৰ ফিটনেছ পৰীক্ষা কৰিবলৈ সহায়ক কৰ্মচাৰীৰ সৈতে প্ৰশিক্ষণ লৈছিল শুভমান গিলে । মেচৰ প্ৰাকক্ষণতো ষ্টেডিয়ামত অনুশীলন কৰিছিল গিলে । বুধবাৰে উৰাজাহাজেৰে আহমেদাবাদত উপস্থিত হৈছিল আৰু বৃহস্পতিবাৰে এখন মাস্ক পিন্ধি আহিছিল মটেৰালৈ । শুকুৰবাৰে তেওঁ মাস্ক অবিহনেই দলৰ সৈতে সন্ধিয়া প্ৰশিক্ষণ লৈছিল ।
গিলৰ উপলব্ধতাই দলটোৰ সাহস বৃদ্ধি কৰিব ৷ কাৰণ তেওঁ এছিয়া কাপত পাক পেচাৰ শ্বাহীন আফ্ৰিদিৰ গতিবেগক নিয়ন্ত্ৰণ কৰি সুন্দৰভাৱে বাউণ্ডেৰী কোবাইছিল । অধিনায়ক ৰোহিতে তিনিজন স্পিনাৰ ব্যৱহাৰ কৰাৰ সম্ভাৱনাও নুই কৰা নাই ৷ তেওঁ কয় যে যদিহে চৰ্ত অনুসৰি প্ৰয়োজন হয় তেন্তে তেওঁ সেই সিদ্ধান্ত ল’ব ।
‘‘মই এতিয়াও খেলপথাৰখন চোৱা নাই যদিও আমি যি কম্বিনেচনত খেলিব বিচাৰো তাৰ বাবে সাজু । আমি কেনেধৰণৰ পৰিস্থিতিত খেলো তাৰ ওপৰত নিৰ্ভৰ কৰি আমাৰ এটা দলৰ বাবে আগলৈ যোৱা প্ৰত্যাহ্বানটোৱেই হ'ল...যদি এটা বা দুটা পৰিৱৰ্তন হয়, আমি সেইটোৰ সৈতে সাজু হ'ম ৷ খেলুৱৈসকলক এনে পৰিৱৰ্তনৰ বিষয়ে বহু আগতেই জনোৱা হৈছে ৷ গতিকে খেলুৱৈসকলৰ ক্ষেত্ৰত সেইটো কোনো সমস্যা হ’ব বুলি মই নাভাবো । যদি আমাৰ বাবে তিনিজন স্পিনাৰে খেলাৰ প্ৰয়োজনীয়তা থাকে তেন্তে আমি তিনিজন স্পিনাৰ লৈ খেলিম ।’’
ইয়াৰ অৰ্থ হ’ব ৰবিচন্দ্ৰন অশ্বিনক অন্তৰ্ভুক্ত কৰা হ’ব যদিহে পাকিস্তানী বেটছমেনসকলৰ স্পিনৰ দুৰ্বলতাৰ লগতে ৰঙা বা ক’লা পিটচৰ প্ৰকৃতিৰ কথাও বিবেচনা কৰা হয় ।
‘‘যদি ক’লা হয়, তেন্তে আমাৰ হাতত এনেকুৱা খেলুৱৈ আছে যিয়ে সেই ধৰণৰ উইকেটত আক্ৰমণ কৰিব পাৰে ৷ যদি ৰঙা হয়, আকৌ সেই পিটচবোৰৰ লগত খাপ খুৱাব পৰা খেলুৱৈও আছে । এই আটাইকেইজন ভাৰতীয় ক্ৰিকেটাৰে এই সকলোবোৰ চৰ্ততে খেলিছে । অধিনায়ক হিচাপে মই যিকোনো ধৰণৰ পৰিস্থিতিত খেলিবলৈ পছন্দ কৰো ।’’ ৰোহিতে কয় ৷