চিটাৰা ডেস্ক, 5 জুলাই : ভাৰতীয় মহিলা ক্ৰিকেট দলৰ পেছঅ’মেন(Indian pacewoman) খ্যাত তথা বিখ্যাত দ্ৰুতবেগী বলাৰ ঝুলন গোস্বামী (Jhulan Goswami)ৰ জীৱনৰ আধাৰত নিৰ্মাণ হ’বলগীয়া ছবিক লৈ ইতিমধ্যে আৰম্ভ হৈছে ব্যাপক চৰ্চা ৷ ছবিখনত ঝুলনৰ চৰিত্ৰ ৰূপায়নৰ ক্ষেত্ৰত মোহময়ী অভিনেত্ৰী অনুষ্কা শৰ্মা (Anushka Sharma)ৰ নাম চৰ্চালৈ আহিছে ৷ 2018 চনৰ ‘Zero’ ছবিখনৰ পাচত অনুষ্কাই ঝুলন গোস্বামীৰ বায়’পিকেৰে পুনৰ ছবিজগতলৈ উভতি অহাৰ কথাও পোহৰলৈ আহিছে ৷
বৰ্তমানেও ছবিখনৰ নিৰ্মাতাই ঝুলনৰ চৰিত্ৰটোক লৈ এক ৰহস্য দাঙি ধৰিছে ৷ সম্প্ৰতি ছবিখন প্ৰি-প্ৰডাকচন স্তৰত থকা বুলি জানিব পৰা গৈছে ৷ শেহতীয়া তথ্য অনুসৰি, ঝুলনৰ বায়’পিকখনৰ সংলাপৰ কাম চলি আছে ৷ ছবিখনৰ সৈতে জড়িত এক সূত্ৰই ৱেবলইডক জনোৱা মতে, ছবিখনৰ বাবে এগৰাকী সঠিক পৰিচালক লাভ কৰা নাই ৷ ইয়াৰ পাচতহে অনুষ্কাক চৰিত্ৰটোৰ বাবে আগবাঢ়িবলৈ অনুমতি প্ৰদান কৰা হ’ব ৷ আন এক সূত্ৰই জনোৱা মতে, ছবিখন 2022 বৰ্ষত মুক্তিলাভ কৰিব ৷