চিটাৰা ডেস্ক, 4 আগষ্ট: বৃহস্পতিবাৰে আছিল অভিনেতা আকাশদ্বীপ ডেকাৰ আৰু প্ৰাক্তন বিধায়িকা আঙুৰলতা ডেকাৰ একমাত্ৰ কন্যা নমামীৰ ওপজা দিন । নমামীৰ ওপজা দিন উপলক্ষে পিতৃ আকাশদ্বীপে আৰম্ভ কৰিলে কন্যাৰ নামেৰে "নমামীৰ প্ৰডাকচন"। য’ত বিভিন্ন ধৰণৰ মনোৰঞ্জনৰ বাবে ছিৰিয়েল, তথ্যচিত্ৰ আৰু চলচ্চিত্ৰ, ৰাইজে উপভোগ কৰিব পাৰিব । সামাজিক মাধ্যম যোগে অনুৰাগীক আকাশদ্বীপ ডেকাই জনালে এই কথা ।
কন্যাৰ জন্মদিন উপলক্ষে আকাশদ্বীপ ডেকাই সামাজিক মাধ্যমত আবেগেৰে ভৰা এটা পোষ্ট শ্বেয়াৰ কৰি এই কথা উল্লেখ কৰে ৷ পোষ্টটোত অভিনেতাগৰাকীয়ে লিখিছে, ‘‘কন্যা সন্তান দেউতাকৰ অতি মৰমৰ আৰু কন্যাৰো দেউতাক বহুত বেছি মৰমৰ । নমামীক মই মোৰ মৰম বিলাক হিয়া ভৰাই উপচাই দিবৰ বাবে যিমান পাৰোঁ যত্ন কৰি আহিছো । তাইয়ে মোৰ সকলো । সময়ে হাজাৰ বাধা দিলেও, হাজাৰ ধুমুহা আনিলেও, মোৰ মৰমৰ পৰা নমামীক বঞ্চিত হ’ব দিয়া নাই, লাগিলে মোৰ বাবে সেয়া হাৰেই হওক বা জিতেই হওক ।’’