নেচনেল ডেস্ক, 25 আগষ্ট : বিশ্ববাসীৰ মাজত এতিয়া ব্যাপকভাৱে চৰ্চা লাভ কৰি আছে তালিবানে আফগানিস্তান দখল কৰা বিষয়টোৱে ৷ এই সকলোবোৰৰ মাজতে পোহৰলৈ আহিছে আফগানিস্তানৰ এগৰাকী প্ৰাক্তন মন্ত্ৰীয়ে জাৰ্মানীতে পিজ্জা ডেলিভাৰী বয় হিচাপে কাম কৰি থকা প্ৰসংগ ৷ কোন এই জন প্ৰাক্তন মন্ত্ৰী ? জানো আহক ৷
তেওঁৰ নাম হৈছে চৈয়দ আহমেদ শ্বাহ সাদাত ৷ মাত্ৰ এটা বছৰ পূৰ্বে চৈয়দ আহমেদ শ্বাহ সাদাত আফগানিস্তান চৰকাৰৰ যোগাযোগ আৰু তথ্য প্ৰযুক্তি দপ্তৰৰ মন্ত্ৰীৰ পদত অধিষ্ঠিত আছিল ৷ কিন্তু আফগানিস্তানৰ ৰাষ্ট্ৰপতি আশ্ৰফ ঘানীৰ সৈতে মতভেদ হোৱাৰ বাবে চৈয়দ আহমেদ শ্বাহ সাদাতে 2020 বৰ্ষতে দেশ ত্যাগ কৰি জাৰ্মানীত থাকিবলৈ লৈছিল ৷
তাৰমাজতে লিপজিগাৰ ভলক্সজেইটুং নামৰ এখন বাতৰি কাকতৰ এক প্ৰতিবেদন অনুসৰি সাদাতে এতিয়া জাৰ্মান চহৰৰ লিপজিগত খাদ্য বিতৰণ কৰা ল’ৰা অৰ্থাৎ ডেলিভাৰী বয় হিচাপে কাম কৰি আছে ৷ একেদৰে অনলাই যোগে প্ৰকাশ পোৱা দৃশ্যবোৰত দেখা গৈছে সাদাতে জাৰ্মানীত ডেলিভাৰী বয়ৰ পোছাক পৰিধান কৰি পিজ্জা বিতৰণ কৰি আছে ৷
মনকৰিবলগীয়া যে, সাদাত 2018 বৰ্ষতে আফগান চৰকাৰৰ যোগাযোগ আৰু তথ্য প্ৰযুক্তি মন্ত্ৰী হৈ আছিল আৰু তালিবানে আফগান দখল কৰাৰ বহু আগতে 2020 চনতে তেওঁ মন্ত্ৰী পদৰ পৰা পদত্যাগ কৰিছিল ৷ জানিব পৰা মতে, সাদাতে যোগাযোগ সম্পৰ্কীয় সমস্যা সামাধন কৰিবলৈ জাৰ্মানীলৈ গৈছিল কিন্তু সেই সময়তে আশ্ৰফ ঘানীৰ সৈতে মতভেদ হোৱাৰ বাবে মন্ত্ৰী ত্যাগ কৰি জাৰ্মানীতে থাকিবলৈ লয় ৷
লগতে পঢ়ক : Air Power Project ৰ অগ্ৰগতিৰ বিষয়ে পৰ্যালোচনা বায়ু সেনা প্ৰধানৰ
ইপিনে জাৰ্মানীত কেইমাহ মান থকাৰ সময়তে সাদাতৰ জমা ধন শেষ হৈ যায় ৷ ভয়ংকৰ সমস্যাত পৰে সাদাত ৷ উপায়ন্তৰ হৈ তেতিয়াই সাদাতে পিজ্জা ডেলিভাৰী বয় হিচাপে কাম কৰিবলৈ বাধ্য হয় ৷ তাৰপাছৰে পৰা সাদাতে এখন চাইকেল লগত লৈ জাৰ্মনী চহৰ খনৰ বিভিন্ন প্ৰান্তত ঘৰে ঘৰে গৈ পিজ্জাকে ধৰি বিভিন্ন ধৰণৰ খাদ্য বিতৰণ বা যোগান ধৰিবলৈ লয় ৷
জি নিউজৰ এক প্ৰতিবেদন অনুসৰি জানিব পৰা গৈছে যে, প্ৰাক্তন আফগান মন্ত্ৰী সাদাতে উল্লেখ কৰিছে যে, তেওঁ অক্সফ’ৰ্ড বিশ্ববিদ্যালয়ৰ পৰা যোগাযোগ আৰু ইলেক্ট্ৰনিক অভিযান্ত্ৰিক দুবাৰকৈ স্নাতকোত্তৰ ডিগ্ৰী লাভ কৰিছে ৷ ইয়াৰ ওপৰিও তেওঁ 13 খন দেশৰ 20 টাতকৈও অধিক কোম্পানীৰ সৈতে যোগযোগৰ ক্ষেত্ৰত কাম কৰিছে ৷
ইয়াৰ লগতে সাদাতে কয়, ‘‘মই সৰলভাৱে জীৱন যাপন কৰি আছো আৰু মই জাৰ্মানী থাকি এতিয়া সুৰক্ষিত অনুভৱ কৰো ৷ সম্প্ৰতি মই লিপজিগত পৰিয়ালৰ সৈতে থাকি সুখী ৷ ইয়াৰ লগতে সাদাতে কয় মই জাৰ্মানীতে থাকিব বিছোৰো আৰু জাৰ্মানতে অধ্যয়ন কৰিব বিচাৰো’’ ৷
সাদাতে কয় যে, ‘‘মই বহু চাকৰিৰৰ বাবে আবেদন কৰিছো, কিন্তু এতিয়ালৈকে কোনো সঁহাৰি পোৱা নাই ৷ মোৰ এটা সপোন আছে মই জাৰ্মান টেলিকম কোম্পানী এটাত কাম কৰিব বিচাৰো’’ ৷ আনহাতে সাদাত আফগানিস্তানৰ সাম্প্ৰতিক পৰিস্থিতি সৰ্ন্দভত প্ৰশ্ন সোধাত মন্তব্য দিবলৈ অস্বীকাৰ কৰে যদিও কয় ‘‘মই আশা কৰা নাছিলো ইমান সোনকালে আশ্ৰফ ঘানী চৰকাৰৰ পতন ঘটিব’’ ৷
উল্লেখযোগ্য যে, দেশৰ ৰাষ্ট্ৰপতি আশ্ৰফ ঘানীয়ে দেশৰ জনতাক পণ বন্ধি কৰি ইতিমধ্যে দেশ ত্যাগ কৰিছে ৷ সম্প্ৰতি প্ৰতিদিনে তালিবানীয়ে দখল কৰা আফগানিস্তানত বিভিন্ন ধৰণৰ ঘটনা সংঘটিত হৈ আছে ৷
লগতে পঢ়কঃ আফগানিস্তানৰ পৰা ভাৰতলৈ অহা ১৬ গৰাকীৰ দেহত Covid 19
