নিউজ ডেস্ক, 17 ডিচেম্বৰ : 13 ডিচেম্বৰৰ সংসদ নিৰাপত্তা ভংগক লৈ প্ৰধানমন্ত্ৰী নৰেন্দ্ৰ মোদীয়ে কৰা মন্তব্যৰ প্ৰতিক্ৰিয়া প্ৰকাশ কৰিছে কংগ্ৰেছে ৷ দেওবাৰে এই সন্দৰ্ভত কংগ্ৰেছে কয় যে প্ৰধানমন্ত্ৰীগৰাকীয়ে বিতৰ্কৰ পৰা ‘পলাই গৈছে’ কিয়নো তেনে কৰিলে বিজেপিৰ সাংসদগৰাকীৰ ওপৰত প্ৰশ্ন উত্থাপন হ’ব যিয়ে অনুপ্ৰৱেশকাৰী দুজনক প্ৰৱেশৰ সুবিধা প্ৰদান কৰিছিল লোকসভাত ৷
প্ৰধানমন্ত্ৰী মোদীয়ে হিন্দী দৈনিক কাকত দৈনিক জাগৰণৰ সৈতে হোৱা এক সাক্ষাৎকাৰত কয় যে সংসদৰ নিৰাপত্তা ভংগৰ গুৰুত্বতাক “তুচ্ছজ্ঞান কৰা উচিত নহয়” আৰু “ইয়াৰ আঁৰৰ উপাদান আৰু উদ্দেশ্য কি সেই বিষয়ে গভীৰতালৈ যোৱাটো” গুৰুত্বপূৰ্ণ ৷ তেওঁ অৱশ্যে পৰামৰ্শ দিছিল যে "এই বিষয়ে বিতৰ্ক কৰাৰ প্ৰয়োজন নাই, এই কাণ্ডৰ বিশদ তদন্ত হ'ব লাগে ৷"
ইয়াৰ প্ৰতিক্ৰিয়া প্ৰকাশ কৰি সংসদ সদস্য তথা কংগ্ৰেছ নেতা জয়ৰাম ৰমেশে কয় যে এই ঘটনা সন্দৰ্ভত গৃহমন্ত্ৰী অমিত শ্বাহৰ বক্তব্যৰ বাবে I.N.D.I.A ব্লকে হেঁচা প্ৰয়োগ কৰি যাব ৷
ৰমেশে এক্সত (টুইটাৰ) লিখিছে- "অৱশেষত 13 ডিচেম্বৰত লোকসভাত সংঘটিত হোৱা অসাধাৰণ ঘটনা সন্দৰ্ভত প্ৰধানমন্ত্ৰীয়ে নিজৰ মৌনতা ভংগ কৰিলে ৷ তেওঁ কয় যে বিতৰ্ক নহয়, তদন্তৰ প্ৰয়োজন আৰু এই তদন্ত চলি আছে ৷ I.N.D.I.A মিত্ৰজোঁটৰ অন্তৰ্গত দলসমূহে 13 ডিচেম্বৰত কি হৈছিল আৰু সঠিকভাৱে কেনেকৈ হ’ল সেই সন্দৰ্ভত গৃহমন্ত্ৰীৰ এক বক্তব্য বিচাৰিব আৰু এই বিষয়ত চৰকাৰক হেঁচা প্ৰয়োগ কৰিব ৷ অতি সহজ কাৰণত বিতৰ্কৰ পৰা পলাই গৈছে প্ৰধানমন্ত্ৰীগৰাকী ৷ 13 ডিচেম্বৰত অনুপ্ৰৱেশকাৰীক লোকসভাত প্ৰৱেশৰ সুবিধা প্ৰদানৰ ক্ষেত্ৰত মহীশূৰৰ বিজেপিৰ সাংসদ প্ৰতাপ সিমহাৰ ভূমিকাক লৈ প্ৰশ্ন উত্থাপন হ’ব ৷"