নেশ্যনেল ডেস্ক, ১৮ জুন :মণিপুৰৰ হিংসাত্মক ঘটনাক লৈ নীৰৱ প্ৰধানমন্ত্ৰী নৰেন্দ্ৰ মোডী ! আনকি দেওবাৰে মন কী বাত অনুষ্ঠানত প্ৰধানমন্ত্ৰীয়ে এবাৰ মণিপুৰৰ বিষয় উল্লেখ নকৰিলে । যাৰ বাবে প্ৰধানমন্ত্ৰীৰ বিৰুদ্ধে ক্ষোভিত হৈছে বিৰোধী কংগ্ৰেছ । মন কী বাত অনুষ্ঠানত প্ৰধানমন্ত্ৰীয়ে মণিপুৰৰ হিংসাত্মক ঘটনা সন্দৰ্ভত নীৰৱতা অৱলম্বন কৰাৰ বাবে কংগ্ৰেছে তীব্ৰ সমালোচনা কৰিছে ।
কংগ্ৰেছৰ সাধাৰণ সম্পাদক জয়ৰাম ৰমেশে এক টুইটযোগে কয় যে, আন এটা মন কী বাতত মণিপুৰৰ ওপৰত মৌনতা অৱলম্বন । দুৰ্যোগ ব্যৱস্থাপনাৰ ক্ষেত্ৰত ভাৰতৰ সামৰ্থ্যৰ বাবে প্ৰধানমন্ত্ৰীয়ে প্ৰশংসা কৰিছে । কিন্তু মণিপুৰে সন্মুখীন হোৱা মানৱীয় দুৰ্যোগৰ বিষয়ে কি হ'ব বুলি কংগ্ৰেছ নেতাগৰাকীয়ে প্ৰশ্ন কৰে । আনকি শান্তি প্ৰতিষ্ঠাৰ বাবে প্ৰধানমন্ত্ৰীয়ে কোনো আহ্বান জনোৱা নাই বুলি কংগ্ৰেছ নেতাগৰাকীয়ে উল্লেখ কৰে । পিএম-কেয়াৰ্ছ ফাণ্ড আছে কিন্তু প্ৰধানমন্ত্ৰীয়ে মণিপুৰৰ প্ৰতি কোনো ব্যৱস্থা নোলোৱাটো ডাঙৰ প্ৰশ্ন বুলি কংগ্ৰেছ নেতাগৰাকীয়ে অভিযোগ কৰে ।
তৃণমূল কংগ্ৰেছেও প্ৰধানমন্ত্ৰীক আক্ৰমণ কৰি কয় যে, এতিয়া মণিপুৰ কি বাতৰ সময় । টিএমচি লোকসভাৰ সদস্য মহুয়া মৈত্ৰাই এক টুইটযোগে কয় যে এতিয়া মণিপুৰৰ কিছুমান কথাৰ বাবে মন কি বাত হ'ব লাগিছিল ।