নেশ্যনেল ডেস্ক, 18 নৱেম্বৰ:অনলাইন গেমৰ প্ৰতি থকা আসক্তিৰ বাবেই অকালতে মৃত্যুক সাৱটিলে এটি 16 বছৰীয়া কিশোৰে ৷অনবৰতে মোবাইল ফোনত গেম খেলি থকাৰ বাবে পিতৃৰ খং উঠাত 16 বছৰীয়া এজন কিশোৰে আত্মহত্যাৰ দৰে চূড়ান্ত সিদ্ধান্ত গ্ৰহণ কৰাৰ খবৰ পোহৰলৈ আহিছে । ঘটনা সন্দৰ্ভত মুম্বাইৰ মালৱানী থানাত গোচৰ পঞ্জীয়ন কৰা হৈছে । বৃহস্পতিবাৰৰ নিশা কিশোৰজনে আত্মহত্যা কৰে আৰু শুকুৰবাৰৰ পুৱা উক্ত কাণ্ডটি পোহৰলৈ আহে ।
মালৱানী আৰক্ষীয়ে জানিবলৈ দিয়া অনুসৰি, "একাদশ শ্ৰেণীৰ ছাত্ৰজনে ইয়াৰ পূৰ্বেও পৰিয়ালৰ লোকক খেল খেলাৰ ক্ষেত্ৰত বাধা প্ৰদান কৰিলে পৰিয়ালৰ ক্ষতি কৰাৰ ভাবুকি দিছিল । কিশোৰজন মোবাইলত উপলব্ধ অনলাইন গেম খেলাৰ ক্ষেত্ৰত সাংঘাতিকভাৱে আসক্ত আছিল । বৃহস্পতিবাৰৰ নিশা তেওঁৰ পিতৃয়ে অনলাইন গেমৰ প্ৰতি থকা তেওঁৰ আসক্তিৰ বাবে প্ৰচণ্ড খং কৰে আৰু কিশোৰজনৰ পৰা ফোনটো লৈ যায় । পৰৱৰ্তী সময়ত শুকুৰবাৰৰ পুৱা 8 বজাত ঘৰটোৰ পাকঘৰত কিশোৰজনৰ মৃতদেহ উদ্ধাৰ কৰে তেওঁৰ পৰিয়ালৰ লোকে । লগে লগে পিতৃয়ে ল’ৰাটোক এখন নাৰ্ছিং হোমলৈ লৈ যায় যদিও চিকিৎসকে তেওঁক মৃত বুলি ঘোষণা কৰে । ইয়াৰ পিছতে তেওঁৰ মৃতদেহ মৰণোত্তৰ পৰীক্ষাৰ বাবে বৰিৱলীৰ ভাগৱতী চিকিৎসালয়লৈ প্ৰেৰণ কৰা হয় ।"