নিউজ ডেস্ক, 16 আগষ্ট :২০২৪ চনৰ লোকসভা নিৰ্বাচনৰ পূৰ্বে বিৰোধী দলক একত্ৰিত কৰিবলৈ চেষ্টা কৰা বিহাৰৰ মুখ্যমন্ত্ৰী নীতিশ কুমাৰে বৃহস্পতিবাৰে দিল্লী ভ্ৰমণৰ দ্বিতীয় দিনা অৰবিন্দ কেজৰিৱালকে ধৰি আন বিৰোধী দলৰ নেতাক সাক্ষাৎ কৰাৰ সম্ভাৱনা আছে ৷ যদিও বুধবাৰৰ দিনটো আলোচনা চলিছিল যে তেওঁ দিল্লীৰ মুখ্যমন্ত্ৰীক সাক্ষাৎ কৰিব পাৰে, কিন্তু এই বৈঠক বুধবাৰে অনুষ্ঠিত ন’হল ৷ চলিত মাহৰ শেষত মুম্বাইত মুখ্যমন্ত্রী গৰাকীয়ে বিৰোধী নেতাসকলক সাক্ষাৎ কৰি প্রস্তাৱিত ভাৰত মিত্রতাৰ কাৰ্যসূচী সন্দর্ভত আলোচনা কৰিব পাৰে ৷
ইয়াৰ পূৰ্বে নীতিশ কুমাৰে ‘অটল সমাধি স্থান’ত উপস্থিত হৈ প্ৰাক্তন প্ৰধানমন্ত্ৰী অটল বিহাৰী বাজপেয়ীৰ মৃত্যু বাৰ্ষিকীত শ্ৰদ্ধাঞ্জলি জ্ঞাপন কৰে ৷ মুখ্যমন্ত্ৰী গৰাকীয়ে কয়, "আমি অটলজীক বহুত সন্মান কৰো ৷ মোৰ প্ৰতিও তেওঁৰ বৰ মৰম আছিল ৷ মই সেইবোৰ কেতিয়াও পাহৰিব নোৱাৰো ৷ প্ৰথমবাৰৰ বাবে বিহাৰৰ মুখ্যমন্ত্ৰী হিচাবে শপত লোৱাৰ সময়ত তেওঁ তাত উপস্থিত আছিল ৷"
বুধবাৰে দিল্লীৰ মুখ্যমন্ত্ৰী অৰবিন্দ কেজৰিৱালৰ জন্মদিনো আছিল ৷ মুখ্যমন্ত্ৰী নীতিশ কুমাৰে পুৱাই টুইট কৰি অভিনন্দন জনায় কেজৰিৱালক ৷ বিহাৰৰ মুখ্যমন্ত্ৰীয়ে অফিচিয়েল টুইটাৰ হেণ্ডেলত লিখিছে, "দিল্লীৰ সন্মানীয় মুখ্যমন্ত্ৰী অৰবিন্দ কেজৰিৱাল জীলৈ জন্মদিনৰ আন্তৰিক শুভেচ্ছা আৰু অভিনন্দন ৷ আপোনাৰ সুস্থাস্থ্য আৰু দীৰ্ঘায়ু কামনা কৰিলোঁ ৷"
লোকসভা নিৰ্বাচনৰ পূৰ্বে সকলো বিৰোধী দলকে একত্ৰিত কৰাৰ কচৰৎত নিয়োজিত নীতিশ কুমাৰৰ উদ্যোগত ২৩ জুনত পাটনাত বিৰোধী দলসমূহৰ এখন বৈঠক অনুষ্ঠিত হয় ৷ য'ত ১৭টা দলৰ নেতাই অংশগ্ৰহণ কৰে ৷ পৰৱৰ্তী সময়ত ১৭-১৮ জুলাইত বেংগালুৰুত দ্বিতীয় ৰাউণ্ডৰ বৈঠক অনুষ্ঠিত হয়, য’ত ২৬টা দলৰ নেতাই অংশগ্ৰহণ কৰে ৷ তাতেই পাৰস্পৰিক সন্মতিৰে INDIA মিত্ৰতাৰ নাম ঘোষণা কৰা হয় ৷ ৩১ আগষ্ট আৰু ১ ছেপ্টেম্বৰত মুম্বাইত তৃতীয় ৰাউণ্ডৰ বৈঠক অনুষ্ঠিত হ’ব ৷ চৰ্চা চলিছে যে, INDIA মিত্ৰজোঁটৰ আহ্বায়ক হিচাপে নীতিশ কুমাৰৰ নাম তাতেই ঘোষণা হ’ব পাৰে ৷
নীতিশ কুমাৰ আৰু অৰবিন্দ কেজৰিৱালৰ সম্ভাৱ্য বৈঠকক লৈ বিহাৰত ৰাজনীতি উত্তপ্ত হৈ পৰিছে ৷ মুখ্যমন্ত্ৰী গৰাকীক আক্ৰমণ কৰিছে বিজেপি নেতাই ৷ বিহাৰ বিজেপিৰ সভাপতি সম্ৰাট চৌধুৰীয়ে কয় যে বিহাৰক মুখ্যমন্ত্ৰীয়ে চম্ভালিব পৰা নাই, তেন্তে দেশক কেনেদৰে চম্ভালিব ৷ একে সময়তে সুশীল মোদীয়ে কয় যে যোৱা এবছৰত কোনো ডাঙৰ নেতাই মিত্ৰজোঁটত যোগদান কৰা নাছিল, কোনো দলো বিৰোধী মিত্ৰজোঁটৰ অংশ হোৱা নাছিল ৷ ইয়াৰ বিপৰীতে উপেন্দ্ৰ কুশৱাহা, আৰ চি পি সিং, জিতন ৰাম মাঞ্জী আদি নেতাই নিজৰ পক্ষ এৰি আমাৰ লগত যোগ দিলে ৷ আনহাতে ৰবি শংকৰ প্ৰসাদে কয় যে নীতিশ কুমাৰে এনে এক বৰযাত্ৰীৰ যাত্ৰাত অংশ ল’বলৈ ওলাইছে, য’ত দৰাৰেই কোনো ঠিকনা নাই ৷