আমবাৰীৰ বস্ত্ৰ ভৱনৰ বাকৰিত তাঁত বিহু উদযাপন
গুৱাহাটী,১৬ এপ্ৰিল:আজি তাঁত বিহু । পৰম্পৰা অনুসৰি চ'তৰ শেষৰ দিনাৰ পৰা বা সংক্ৰান্তিৰ পৰা ব'হাগৰ ছয় তাৰিখলৈ সাত বিহু উদযাপন কৰে কৃষিজীৱি অসমীয়াই । এই সাত বিহুৰ অন্যতম হৈছে তাঁত বিহু । ইয়াক সাত বিহুৰ চতুৰ্থ দিনা পালন কৰা হয় । এইবেলি, অসম চৰকাৰৰ হস্ততাঁত আৰু বস্ত্রশিল্প বিভাগে পোন প্ৰথমবাৰৰ বাবে আমবাৰীৰ বস্ত্ৰ ভৱনৰ বাকৰিত আয়োজন কৰা হয় তাঁত বিহু ।
বিভাগৰ বিষয়া-কৰ্মচাৰীসকলে পৰম্পৰাগত সাজেৰে আহি বস্ত্ৰ ভৱনত থকা তাঁত শালসমূহ সজাই-পৰাই তুলি আৰু ধূপ-ধূনা চাকি-বন্তি জ্বলাই পূজা-অর্চনা কৰিছে । তাঁত বিহু উপলক্ষে বিহুসুৰীয়া গীত-মাত, হুঁচৰিৰ এক অনুষ্ঠানৰ আয়োজন কৰা হয় । ইয়াৰ পূৰ্বে তাঁত বিহুৰ তাৎপর্য আৰু পৰম্পৰা এই বিষয়ৰ ওপৰত বিশেষ বক্তৃতা প্রদান কৰে অসম টেক্সটাইল ইনষ্টিটিউটৰ জ্যেষ্ঠ শিক্ষক তথা বিশিষ্ট নিবন্ধকাৰ ৰবীন খাটনিয়াৰে ।