গোলাঘাট, 21 ফেব্ৰুৱাৰী: দেৰগাঁও আৰক্ষী প্ৰশিক্ষণ কেন্দ্ৰত অনুষ্ঠিত হোৱা অসম ক্ৰীড়া উৎসৱ-২০২৪ ৰ আজি সফল সামৰণি পৰে । সামৰণি অনুষ্ঠানত মুখ্য অতিথি হিচাপে উপস্থিত থাকে অসম আৰক্ষীৰ আৰক্ষীৰ সঞ্চালক প্ৰধান জি পি সিং ৷
সাংবাদিকৰ সন্মুখত গুৰুত্বপূৰ্ণ মন্তব্য আগবঢ়ায় আৰক্ষী সঞ্চালক প্ৰধানগৰাকীয়ে ৷ শীৰ্ষ আৰক্ষী বিষয়াগৰাকীয়ে জনোৱা মতে ভাৰতৰ স্বাধীনতাৰ পিচত প্ৰায় ৯০০ জন আৰক্ষী জোৱান শ্বহীদ হৈছে তাৰে দুজনক কীৰ্তি চক্ৰৰে বিভূষিত কৰা হৈছে ৷ অসম আৰক্ষীৰ সাতগৰাকী শ্বহীদৰ নামত চলন্ত ট্ৰফী প্ৰদান কৰা হৈছে এইবৰ্ষৰ পৰা ।
ডিব্ৰুগড় কেন্দ্ৰীয় কাৰাগাৰত সংঘটিত হোৱা ঘটনা সম্পৰ্কত জ্ঞানেন্দ্ৰ প্ৰতাপ সিঙে কয় যে উক্ত ঘটনা সংঘটিত হোৱাৰ পিচত কাৰাগাৰত ভিতৰত চি চি কেমেৰা নিৰীক্ষণ কৰিবলৈ ইতিমধ্যে জে’ল কৰ্তৃপক্ষক অনুৰোধ কৰা হৈছে । চি চি কেমেৰা নিৰীক্ষণ কৰি জে’লৰ ভিতৰৰ পৰা মোবাইল ফোন আৰু বিভিন্নধৰণৰ আপত্তিজনক সামগ্ৰী উদ্ধাৰ কৰিবলৈ সক্ষম হৈছে । ইয়াৰোপৰি উক্ত ঘটনাৰ তদন্ত প্ৰক্ৰিয়া আৰম্ভ কৰাৰ লগতে এক গোচৰ ৰুজু কৰা হৈছে ।
আনহাতে কংগ্ৰেছ নেতা ৰাহুল গান্ধীয়ে গুৱাহাটীত উলিওৱা ভাৰত জোড়ো ন্যায় যাত্ৰাত অপ্ৰীতিকৰ পৰিস্থিতি সৃষ্টি কৰা ব্যক্তিসকলৰ বিৰুদ্ধে গোচৰ ৰুজু কৰা হৈছে আৰু এই সমগ্ৰ ঘটনা সম্পৰ্কে চি আই পিয়ে তদন্ত প্ৰক্ৰিয়া আৰম্ভ কৰিছে ।