বিজেপিৰ ৰাজ্যিক সভাপতি ভৱেশ কলিতা
যোৰহাট, ১৭ মাৰ্চ:যোৰহাট ৰজাবাৰীৰ আই টি আই খেলপথাৰ প্ৰাংগনত ৰাণা গোস্বামীৰ নেতৃত্বত বিজেপিৰ ৰাজ্যিক সভাপতি ভৱেশ কলিতা আৰু মন্ত্ৰী পীযুষ হাজৰীকাৰ উপস্থিতিত কংগ্ৰেছৰ সহস্ৰাধিক নেতা-কৰ্মীয়ে বিজেপিত যোগদান কৰে । এই যোগদান সমাৰোহত অংশগ্ৰহণ কৰি ৰাজ্যিক বিজেপিৰ সভাপতি ভৱেশ কলিতাই কয় যে সমগ্ৰ দেশৰ লগতে অসমতো এতিয়া যোগদান কাৰ্যসূচী চলি আছে । ফলত সমগ্ৰ দেশ এতিয়া মোদীময় হৈ পৰিছে ।
আনহাতে, যোৰহাট লোকসভা সমষ্টি কংগ্ৰেছ প্ৰাৰ্থী গৌৰৱ গগৈক কটাক্ষ কৰি ৰাজ্যিক বিজেপিৰ সভাপতি ভৱেশ কলিতাই কয়,"তৰুণ গগৈৰ পুত্ৰ হোৱা বাবে গৌৰৱ গগৈয়ে কংগ্ৰেছৰ পৰা টিকট লাভ কৰিছে । কংগ্ৰেছত আছে পৰিয়াল কেন্দ্ৰিক, তুষ্টিকৰণ প্ৰথা, কিন্তু বিজেপিত এনেবোৰ প্ৰথা নাই । আজি ৰাইজ বিকাশ যাত্ৰাৰ লগত আছে । সেয়েহে ১৪টা লোকসভা সমষ্টিৰ ভিতৰত বিজেপিয়ে ১৩টা সমষ্টিত জয়ী হ'ব ।"