ধেমাজি, 7 এপ্ৰিল: 12 নং লক্ষীমপুৰ লোকসভা সমষ্টিৰ ইণ্ডিয়া মিত্ৰজোঁটৰ ভাৰতীয় জাতীয় কংগ্ৰেছৰ মনোনীত প্ৰাৰ্থী উদয় শংকৰ হাজৰিকাৰ নিৰ্বাচনী প্ৰচাৰ সভাত অংশগ্ৰহণ কৰে অসম প্ৰদেশ কংগ্ৰেছৰ সভাপতি ভূপেন বৰা আৰু বিধায়ক অখিল গগৈয়ে ৷ গোগামুখ মহৰিকেম্প গ্ৰাম্য ক্ৰীড়া প্ৰকল্পৰ খেলপথাৰত আয়োজন কৰা হয় এই নিৰ্বাচনী সভাৰ ৷ বিৰোধী ঐক্য মঞ্চৰ কংগ্ৰেছ প্ৰাৰ্থী উদয় শংকৰ হাজৰিকাৰ হৈ প্ৰচাৰ অভিযানত অংশ লৈ ভূপেন বৰা আৰু অখিল গগৈয়ে শাসনাধিষ্ঠিত বিজেপিৰ বিৰুদ্ধে সৰৱ হৈ পৰে ।
ভাষণত অখিল গগৈয়ে মূল্যবৃদ্ধিৰ প্ৰসংগ উল্লেখ কৰাৰ লগতে নকল অৰুণোদয় ফৰ্ম লৈ বিজেপিয়ে ঘৰে ঘৰে যাব লগা হোৱা প্ৰসংগ উল্লেখ কৰি বিজেপিক কঠোৰ ভাষাৰে সমালোচনা কৰে ৷ নদীবান্ধৰ বিৰোধিতা কৰাসকলক বিজেপিক ভোট নিদিবলৈ আহ্বান জনায় বিধায়ক অখিল গগৈয়ে ।
আনহাতে, জাতীয় সমস্যাবোৰৰ পৰা ৰাইজৰ দৃষ্টি আঁতৰাই ৰাখিবলৈহে ৰাজ্যৰ মুখ্যমন্ত্ৰী হিমন্ত বিশ্ব শৰ্মাই 'মুখ্যমন্ত্ৰী কোন হ’ব' জাতীয় প্ৰশ্ন সংবাদ মাধ্যমৰ উল্লেখ কৰি আহিছে বুলি প্ৰদেশ কংগ্ৰেছৰ সভাপতি ভূপেন বৰাই কয় ৷ ইয়াৰ লগতে প্ৰদেশ কংগ্ৰেছৰ সভাপতিগৰাকীয়ে মুখ্যমন্ত্ৰীৰ 'ৰাজ্যৰ পৰৱৰ্তী মুখ্যমন্ত্ৰী কোন হ’ব' ইয়াৰ বাহিৰে আন কোনো কথাৰেই চিন্তা নাই বুলি মুখ্যমন্ত্ৰী শৰ্মাক কটাক্ষ কৰে ৷