ଭୁବନେଶ୍ବର: ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦରରେ ଭିସ୍ତାରା ବିମାନର ଜରୁରୀ ଅବତରଣ । ଭୁବନେଶ୍ବରରୁ ଦିଲ୍ଲୀ ଅଭିମୁଖେ ଉଡ଼ାଣ ଭରିଥିଲା ବିମାନ । ଟେକଅପ୍ କରିବାର ମାତ୍ର 10 ମିନିଟ ପରେ ଜରୁରୀ ଅବତରଣ କରିଛି ଭିସ୍ତାରା ବିମାନ । ତେବେ କୁଆପଥର ମାଡ଼ ପ୍ରଭାବରେ ୱିଣ୍ଡସିଲ୍ ଭାଙ୍ଗିବାରୁ ଜରୁରୀ ବିମାନ ଅବତରଣ କରିଛି । ବିମାନରେ 169 ଯାତ୍ରୀ ଥିବା ବେଳେ ସମସ୍ତେ ସୁରକ୍ଷିତ ଅଛନ୍ତି । ଜରୁରୀ ଅବତରଣ ନେଇ ବିମାନ ବନ୍ଦର ନିର୍ଦ୍ଦେଶକ ସୂଚନା ଦେଇଛନ୍ତି ।
ସୂଚନା ଅନୁସାରେ, ଆଜି (ବୁଧବାର) ସମୟ 1.45 ବେଳେ ଭୁବନେଶ୍ବର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରୁ ନୂଆଦିଲ୍ଲୀ ଅଭିମୁଖେ ଭିସ୍ତାରା ଏୟାରଲାଇନ୍ସର ଏକ ବିମାନ ଉଡାଣ ଭରିଥିଲା । ବିମାନଟି ଟେକଅପ୍ କରିବାର ମାତ୍ର 10 ମିନିଟ ମଧ୍ୟରେ ଜରୁରୀକାଳୀନ ଅବତରଣ କରିଛି । ପ୍ରାରମ୍ଭିକ ରିପୋର୍ଟ ଅନୁଯାୟୀ, ଆଜି ଅପରାହ୍ନରେ ଓଡିଶାର ଅନେକ ସ୍ଥାନରେ କୁଆପଥର ଦେଖିବାକୁ ମିଳିଥିବା ବେଳେ ଭିସ୍ତାରା ବିମାନର ୱିଣ୍ଡସିଲ୍ରେ କୁଆପଥର ମାଡ ହେବା ଫଳରେ ୱିଣ୍ଡସିଲ୍ ଭାଙ୍ଗି ସାମାନ୍ୟ କ୍ଷତିଗ୍ରସ୍ତ ହୋଇଛି । ଯାହାକୁ ନେଇ ବିମାନକୁ ଜରୁରୀକାଳୀନ ଅବତରଣ କରାଯାଇଛି ।
ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର (ବିପିଆଇଏ) ନିର୍ଦ୍ଦେଶକ ପ୍ରସନ୍ନ ପ୍ରଧାନଙ୍କ ଅନୁଯାୟୀ, ବିମାନରେ ୮ କ୍ରୁ ମେମ୍ବରଙ୍କ ସହ 169 ଜଣ ଯାତ୍ରୀ ଥିଲେ । ସମସ୍ତ ଯାତ୍ରୀ ସୁରକ୍ଷିତ ଥିବାବେଳେ ବିମାନଟି ବିମାନ ବନ୍ଦରରେ ନିରାପଦରେ ଅବତରଣ କରିଛି । ଅଟକି ରହିଥିବା ଯାତ୍ରୀମାନଙ୍କୁ ସେମାନଙ୍କ ଗନ୍ତବ୍ୟ ସ୍ଥଳକୁ ପଠାଇବା ପାଇଁ ଏକ ବିକଳ୍ପ ବିମାନର ବ୍ୟବସ୍ଥା କରାଯାଉଛି ।
ଏନେଇ ବିପିଆଇଏ ନିର୍ଦ୍ଦେଶକ ପ୍ରସନ୍ନ ପ୍ରଧାନ କହିଛନ୍ତି, "ଭିସ୍ତାରା ଏୟାରକ୍ରାଫ୍ଟ ଆଜି ଦିନ 1.45 ମିନିଟରେ ଭୁବନେଶ୍ବରରୁ ଦିଲ୍ଲୀ ପାଇଁ ଉଡାଣ ଭରିଥିଲା । ଏହାର 10 ମିନିଟ ପରେ ୱିଣ୍ଡସିଲ୍ର କ୍ଷତିଗ୍ରସ୍ତ ହୋଇଥିବାରୁ ବିମାନକୁ ଅବତରଣ କରିବା ନେଇ ପାଇଲଟ ସୂଚନା ଦେଇଥିଲେ । ପରେ 2.15ରେ ବିମାନ ଅବତରଣ କରିଥିଲା । ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି । କୁଆପଥର ମାଡ଼ରେ ୱିଣ୍ଡସିଲ୍ କ୍ଷତିଗ୍ରସ୍ତ ହୋଇଛି । ବିମାନରେ 8 ଜଣ କ୍ରୁ ମେମ୍ବରଙ୍କ ସହ 161 ଜଣ ଯାତ୍ରୀ ଥିଲା ।"
ଏହା ମଧ୍ୟ ପଢ଼ନ୍ତୁ..ଭିସ୍ତାରା ଏୟାରଲାଇନ୍ସ ଉପରେ ବର୍ଷିଲେ ସୁରଭୀ, 'ମୋତେ ମାନସିକ ନିର୍ଯାତନା ଦିଆଯାଇଛି'
ତେବେ ରାଜ୍ୟରେ ଆଜି ଅନେକ ସ୍ଥାନରେ କାଳବୈଶାଖୀର ପ୍ରଭାବ ଦେଖିବାକୁ ମିଳିଛି । ଟ୍ବିନ ସିଟି ଭୁବନେଶ୍ୱର ଓ କଟକ ସମେତ ରାଜ୍ୟର କିଛି ସ୍ଥାନରେ କୋହଲା ପାଗ ସହ କୁଆପଥର ଓ ଝିପିଝିପି ବର୍ଷା ହେଉଛି । କାଳବୈଶାଖୀ ଓ ବଜ୍ରପାତ ନେଇ ଖୋର୍ଦ୍ଧା, ଗଞ୍ଜାମ, ନୟାଗଡ଼, କଟକ, କନ୍ଧମାଳ ଜିଲ୍ଲାକୁ ଆଲର୍ଟ ଜାରି କରିଛି ପାଣିପାଗ ବିଭାଗ ।
ଇଟିଭି ଭାରତ, ଭୁବନେଶ୍ବର
