ریاست بہار کے شہر گیا میں واقع اقلیتی ادارہ مرزا غالب کالج Mirza Ghalib College میں کردار سازی کے عنوان پر ٹیچرز نے طلباء کے ساتھ اظہار خیال کیا۔ شعبہ اردو کی اسسٹنٹ پروفیسر شفقت رانا نے کہا کہ رمضان المبارک میں کالج کی طرف سے بچوں کے لیے اسلامی تعلیمات اور معلومات کے حوالے سے جانکاری دی جاتی ہے، کیونکہ رمضان بچوں کی تربیت اور کردار سازی کا بھی مہینہ ہے۔
بچوں کو بتدریج روزہ رکھنے کی عادت ابھی سے ڈلوائیں۔ نسبتاً بڑے بچوں کو جن پر روزے فرض ہونے والے ہوں، زور زبردستی نہیں بلکہ عادت ڈلوانے کی غرض سے پیار محبت سے روزے رکھوائیں اور یہ معاملہ ہردن کا نہیں ہو بلکہ ہفتہ دو ہفتے میں ایک دن کا ہو انہیں روزہ رکھنے کے بعد تحفے سے نوازیں۔ عمر کے مطابق اس کے فضائل اور نعمتوں سے آگاہ کریں۔ جب کہ اسسٹنٹ پروفیسر احسان اللہ دانش نے کہا کہ رمضان پرہیز گاری اور کردار سازی کا مہینہ ہے۔
ایسے میں ہماری کوشش ہونی چاہیے کہ کم عمری سے ہی اپنے بچوں کے کردار کو بہتر بنائیں رمضان میں صبر و تحمل رواداری محبت پیار کی پہچان کرائیں۔ انہوں نے بتایا کہ کالج کا شعبہ اردو ہر برس اس طرح کے عنوان پر مباحثہ کراتا ہے تاکہ بچوں کی معلومات میں اضافہ بھی ہو اور وہ خود ذمہ دار بنیں۔
