چنئی: تمل ناڈو کے وزیر اعلی اور ڈی ایم کے صدر ایم کے اسٹالن نے جمعرات کے روز بی جے پی کی حامی طاقتوں پر سناتن دھرم سے متعلق ان کے بیٹے اور وزیر کھیل ادے نیدھی اسٹالن کے تبصرے پر 'جھوٹا بیانیہ' پھیلانے کا الزام لگایا۔ اسٹالن نے ایک بیان میں ادے نیدھی کے تبصرے کا دفاع کرتے ہوئے الزام لگایا کہ اپنے کسی بھی وعدے کو پورا کرنے میں ناکام رہنے والے وزیر اعظم نریندر مودی سناتن دھرم کے تبصرے کو ہوا دے کر عوام کی توجہ ہٹانے کی کوشش کر رہے ہیں۔
انہوں نے کہا کہ 'نہ ہی وزیر اعظم اور نہ ہی ان کے وزراء نے منی پور جیسے مسائل یا سی اے جی کی رپورٹ میں ظاہر کردہ 7.50 لاکھ کروڑ روپے کی بدعنوانی پر کوئی جواب دیا ہے۔ لیکن انہوں نے سناتن دھرم کے مسئلے پر کابینہ کی میٹنگ بلائی۔ کیا یہ لیڈر صحیح معنوں میں پسماندہ ذاتوں، درج فہرست ذات وقبائل کے لوگوں کا تحفظ اور خواتین کی ترقی کر سکتے ہیں؟ انہوں نے کہا کہ"یہی وجہ ہے کہ بابا صاحب امبیڈکر کے پوتے پرکاش امبیڈکر نے گزشتہ روز لکھا کہ سناتن دھرم ذات پات اور اچھوت پر یقین رکھتا ہے۔ ہم سناتن دھرم کو کیسے قبول کر سکتے ہیں؟ کیا وزیر اعظم کے پاس کوئی جواب ہے؟"
وزیر اعلیٰ نے کہا کہ ایسا لگتا ہے کہ بی جے پی کی مخالف پارٹیوں کے ذریعہ بنائے گئے انڈیا اتحاد نے وزیر اعظم کو جھنجھوڑ دیا ہے۔ وہ خوف کے مارے 'ون نیشن ون الیکشن' کی تجویز لا رہے ہیں۔ اس سے یہ واضح ہے کہ بی جے پی سناتن دھرم میں موجود امتیازی سلوک کے بارے میں واقعی فکر مند نہیں ہے، بلکہ وہ اپوزیشن اتحاد کے اندر تقسیم پیدا کرنے کے لیے بے چین ہے۔ اسٹالن نے مزید کہا، اس کو سیاسی چال تسلیم کرنے کے لیے کسی سیاسی ذہانت کی ضرورت نہیں ہے۔
یہاں تک کہ آر ایس ایس کے سربراہ موہن بھاگوت نے کہا ہے کہ 'ہم نے اپنے ہی ہم وطن انسانوں کو سماجی نظام میں پیچھے رکھ دیا ہے۔ ہم نے ان کی پرواہ نہیں کی، اور یہ سلسلہ تقریباً 2,000 سال تک جاری رہا۔ جب تک ہم انہیں برابری کا درجہ فراہم نہیں کرتے، کچھ خصوصی بندوبست کرنے ہوں گے۔ ریزرویشن کا بندوبست ان میں سے ایک ہے۔ ریزرویشن اس وقت تک جاری رہنا چاہیے جب تک کہ اس طرح کا امتیاز ختم نہ ہو۔'
انہوں نے کہا کہ اگر بی جے پی کو اس بارے میں مزید وضاحت کی ضرورت ہے کہ وزیر ادے نیدھی نے کیا بات کی ہے تو انہیں موہن بھاگوت سے مشورہ کرنا چاہئے۔ وزیر اعلی نے کہا کہ وسیع تجربہ اور ملک کے تئیں پختہ وابستگی رکھنے والے لیڈران سیاسی فائدے کے لیے بی جے پی کی پھوٹ ڈالنے کی سیاست میں شامل ہونے سے گریز کریں گے اور وہ ہمارے ملک کو بی جے پی سے بچانے کی کوششیں تیز کریں گے۔
یہ بھی پڑھیں:
- سناتن دھرم تنازع، بہتان پھیلانا ہی بی جے پی کی بقا کا طریقہ، ادے ندھی
- ادھے نیدھی اور اے راجہ کے خلاف سپریم کورٹ میں عرضی دائر، ایف آئی آر درج کرنے کا مطالبہ
اسٹالن نے کہا "جہاں تک ڈی ایم کے کا تعلق ہے، ہمارے نظریات اور اہداف صاف اور شفاف ہیں۔ ہم "ایک کنبہ، ایک بھگوان" کے تحریک کے تحت کام کرتے ہیں۔ "آئیے غریبوں کی خوشی میں بھگوان کو تلاش کریں"۔ ہماری تحریک کا مقصد پسماندہ، انتہائی پسماندہ، درج فہرست ذات و قبائل، اقلیتوں، خواتین اور غریبوں کی ترقی کرنا ہے۔ اسی لیے تمل ناڈو کے لوگوں نے ہمیں چھٹی بار ریاست میں اقتدار کی ذمہ داری سونپی ہے۔
وزیر اعلی نے کہا کہ ہم نے اس بات کو یقینی بنایا ہے کہ تمل ناڈو میں تمام ذاتوں کے لوگ مندر کے پجاری بن سکتے ہیں۔ یہ پہلی ریاست ہے جس نے خواتین کو آبائی جائیداد میں مساوی حقوق دیے۔ ڈی ایم کے نے خواتین کو وہ اختیارات فراہم کیے جو سناتن کے اصولوں سے متضاد ہیں۔ انہوں نے کہا کہ"ہم ہر فرد کے جذبات کا احترام کرتے ہیں اور انہیں عزت دار شہری بنانے کی کوشش کرتے ہیں۔ ہماری تحریک نسل، زبان یا ذات سے سے قطع نظر ہر کسی کے لیے پرامن زندگی کو یقینی بنانے کے لیے ہے۔ اسٹالن نے خبردار کیا کہ اگر بی جے پی یہ سوچتی ہے کہ وہ ڈی ایم کے جیسی مستحکم پارٹی کی شہرت کو داغدار کر سکتی ہے تو وہ خود کو اس دلدل میں ڈوبتے ہوئے پائے گی۔ (یو این آئی)
