جموں (جموں و کشمیر) : جموں شہر کے مضافات میں سرحدی ضلع راجوری سے تعلق رکھنے والے ایک نوجوان کی لاش ایک مقامی ہوٹل سے برآمد ہوئی۔ ابتدائی معلومات کے مطابق متوفی ریاست چندی گڑھ کے ایک کالج میں بی ٹیک کی تعلیم حاصل کر رہا تھا، وہ ہفتہ کو، ایک دوست کے ہمراہ، جموں پہنچے تھے اور انہیں اتوار کو چندی گڑھ روانہ ہونا تھا۔
ذرائع کے مطابق ہفتہ کو متوفی نوجوان، جس کی شناخت عمران کے طور پر ہوئی ہے، اپنے ایک دوست کے ہمراہ جموں کے گجر نگر کے ایک ہوٹل میں کرائے پر کمرہ لیا اور رات وہیں گزارنے کا ارادہ کیا۔ عمران کی لاش صبح ہوٹل کمرے سے برآمد ہوئی جبکہ دوسرا نوجوان فرار ہے۔ پولیس اس معاملے کی تفتیش کر رہی تاہم متوفی کے جسم پر زخم کا کوئی نشان نہیں ہے۔ پولیس نے واقعہ کی اطلاع اہل خانہ کو دے دی ہے۔
پولیس نے لاش کو اپنی تحویل میں لیکر پوسٹ مارٹم کے لیے متعلقہ اسپتال پہنچایا۔ پولیس نے معاملہ کی نسبت کیس درج کرکے مزید تفتیش شروع کر دی ہے۔ طبی و قانونی لوازمات کی تکمیل کے بعد میت کو آخری رسومات کے لئے لواحقین کے سپرد کر دیا گیا۔ ادھر، لواحقین نے قتل کا الزام عائد کرتے ہوئے پولیس سے باریک بینی سے معاملہ کی چھان بین کرنے اور دوسرے شخص کو فوری طور ڈھونڈ نکالنے کی گزارش کی ہے۔
مزید پڑھیں: Man Found Dead With Bullet Injury شوپیاں میں ایک شحص مردہ حالت میں پایا گیا
گجر نگر پولیس نے تحقیقات کا آغاز کر دیا ہے اور عمران کے دوست، جو ہوٹل سے فرار ہے، کی تلاش شروع کر دی ہے۔ پولیس ذرائع سے معلوم ہوا ہے کہ اس حوالہ سے جموں پولیس نے دو ٹیمیں تشکیل دی ہیں اور ہوٹل اور نزدیکی علاقوں میں سی سی ٹی فوٹیج کی مدد بھی لی جا رہی ہے۔
