وزیراعظم نریندر مودی کی تنقید والے پوسٹر چسپاں کرنے کے معاملے میں دہلی پولیس نے مختلف علاقوں سے کل 25 لوگوں کو گرفتار کیا ہے۔ جبکہ معاملے میں پولیس نے 25 ایف آئی آر درج بھی کی ہیں۔
معلوم ہوکہ پوسٹر وزیراعظم کے خلاف لگائے گئے تھے۔ ان پوسٹروں پر لکھا تھا ''مودی جی ہمارے بچوں کی ویکسین بیرون ممالک میں کیوں بھیج دی'' دہلی میں کئی جگہوں پر ایسے پوسٹر چسپاں کیے گئے تھے۔
دہلی پولیس کے ایک سینئر اہلکار نے بتایا کہ اس معاملے میں دہلی کے اندر 25 ایف آئی آر درج کی گئی ہیں اور 25 لوگوں کو گرفتار کر کے پوچھ تاچھ کی جارہی ہے۔
پولیس کا دعوی ہے کہ گرفتار کیے گئے ایک شخص نے بتایا کہ اسے پوسٹر لگانے کے لیے 500 روپیے ملے تھے۔ گرفتار کیے گئے لوگوں میں آٹو ڈرائیور، کارپینٹر بھی شامل ہیں۔ پولیس سی سی ٹی وی فوٹیج کو جمع کر رہی ہے۔
