ریاست بہار کے ضلع گیا میں واقع مرزا غالب کالج کے سکریٹری شبیع عارفین شمسی کو اے این کالج پٹنہ میں گلوبل بہار ایجوکیشن ایوارڈ 2023 سے نوازا گیا ہے۔ انہیں یہ اعزاز مگدھ یونیورسٹی کے وائس چانسلر پروفیسر ششی پرتاپ شاہی اور انڈین پولیس سروس آفیسر کم انسپکٹر جنرل آف پولیس وکاس ویبھو اور فیشن ڈیزائنر نتیش چندرا نے مشترکہ طور پر دیا۔
اس موقع پر دیگر معززین کے علاوہ پٹنہ یونیورسٹی اور پاٹلی پترا یونیورسٹی کے وائس چانسلر بھی موجود تھے۔ یہ ٹیلنٹ اعزاز ملک بھر اہمیت کا حامل ہے۔ انہیں یہ ایوارڈ ایس۔آر ایم یونیورسٹی حیدرآباد کی جانب سے دیا گیا ہے۔ قابل ذکر ہے کہ یہ ایوارڈ ملک بھر سے منتخب خاص لوگوں کو دیا جاتا ہے، جنہوں نے تعلیم کے میدان میں اہم کام کیا ہے۔ بتاتے چلیں کہ سیکرٹری شمسی مرزا غالب کالج گیا کو ترقی کی راہ پر گامزن کر رہے ہیں۔ جس کے لیے اس سے قبل بھی انہیں کئی اعزازات اور انعامات سے نوازا جا چکا ہے۔ خاص طور پر گیا ضلع میں انہیں یہ اعزاز ملنے پر خوب چرچا ہے اور مرزا غالب کالج میں خوشی کا ماحول ہے۔
شبیع شمسی نے مرزا غالب کالج کو ترقی کی راہ پر گامزن کر کے نہ صرف بہار میں بلکہ ملکی سطح پر بھی کالج کی شناخت بنائی ہے۔ شمسی گیا کے واحد ماہر تعلیم ہیں، جنہیں اس ایوارڈ سے نوازا گیا ہے۔ مرزا غالب کالج اقلیتی لسانی کالج ہے۔ حال کے برسوں میں معیاری تعلیم کے ساتھ یہاں تعمیراتی کاموں سے کالج نے سرخیاں بٹوری ہیں۔ اس بار انٹر میڈیٹ امتحان 2023 میں کالج کی ایک طالبہ نے کامرس میں پورے بہار میں پہلی پوزیشن حاصل کی ہے۔ وہیں اس ایوارڈ سے نوازے جانے پر کالج کے ملازمین، خیر خواہوں، دوستوں اور گیا کے رہائشیوں نے شبیع شمسی کو مبارکباد دی ہے۔
