پہلگام کارنیوال کے نام سے منسوب دو روزه سرمائی ٹورزم فیسٹیول کا پہلگام میں آغاز ہوا۔ فیسٹیول کا افتتاح ڈائریکٹر ٹورزم کشمیر غلام نبی ایتو نے کیا۔
اس موقع پر پہلگام کے مختلف مقامات پر ثقافتی اور تمدنی پروگرام پیش کیے گئے۔ شام کے وقت پہلگام کے جے کے ٹی ڈی سی کلب میں رنگا رنگ پروگرام کا اہتمام کیا گيا۔ اس دوران کشمیر کی ثقافت و تمدن کی عکاسی کے لئے مختلف اسٹال بھی قائم کیے گئے۔ اس میلے کا مقصد سیاحوں کو راغب کرنا ہے۔
موسم سرما سے لطف اندوز ہونے والے سیکڑوں سیاح پہلگام میں قیام اور تقریب میں شریک ہوئے۔ پہلگام میں ہونے والے اس فیسٹیول میں کشمیر کے مشہور فنکار بھی موجود ہیں۔
یہ بھی پڑھیں: پہلگام: سیاحوں کی آمد سے فوٹوگرافر بے حد مسرور
ای ٹی وی بھارت سے بات کرتے ہوئے کچھ غیر ریاستی سیاحوں نے کہا کہ 'یہ جگہ ایک سیاح کی حیثیت سے بہت خوبصورت ہے۔ ہمیں یہاں آکر کوئی ڈر محسوس نہیں ہوا۔ ہم اپنے تمام دوستوں، رشتہ داروں کو ایک بار کشمیر کے دورے پر جانے کی تجویز کریں گے۔ ہم کشمیر کی خوبصورتی کو نہیں بھول سکیں گے۔'
انہوں نے مزید کہا کہ کشمیر کی خوبصورتی اور کشمیر کی مہمان نوازی کے ساتھ ساتھ کشمیر کا موسم بہت اچھا ہے، لہذا ہر ایک کو اپنی زندگی میں ایک بار پہلگام انا چاہیے۔
