سوڈان کے دارالحکومت خرطوم میں امریکی سفارتخانے نے پیر کے روز بتایا کہ امریکی وزیر خارجہ مائیک پومپیو نے سوڈان کو دہشت گردی کے اسٹیٹ اسپانسرز کی فہرست سے نکالنے کے ایک نوٹیفکیشن پر دستخط کر دیے ہیں۔
سوڈان کو دیے گئے 45 دن کے ایک نوٹیفکیشن کا عرصہ ختم ہونے کے بعد امریکی وزیر خارجہ نے ایک نوٹیفکیشن پر دستخط کیا جس میں کہا گیا ہے کہ سوڈان کو دہشت گردی کے اسٹیٹ اسپانسرز کی لسٹ سے باہر نکالنے کا فیصلہ 14 دسمبر سے مؤثر ہے۔ خرطوم میں واقع امریکی سفارت خانے نے فیس بک پر لکھی گئی ایک پوسٹ میں اس بات کی تصدیق کی ہے۔
ہم آپ کو بتا دیں کہ اس سے قبل اکتوبر میں صدر ٹرمپ نے اعلان کیا تھا کہ امریکہ میں ہوئے دہشت گردانہ حملوں کے متاثرین کو 335 ملین امریکی ڈالر کی ادائیگی کے بعد سوڈان کو دہشت گردی کے اسٹیٹ اسپانسرز کی فہرست سے نکال دیا جائے گا۔
اناڈولو نیوز ایجنسی کی ایک رپورٹ کے مطابق، یہ اعلان امریکہ اور سوڈان کے مابین تعلقات میں ایک سنگ میل کی حیثیت رکھتا ہے اور یہ تعلقات 2019 میں سابق رہنما عمر البشیر کو اقتدار سے ہٹائے جانے کے بعد سے مستقل طور پر بہتری کی جانب گامزن ہیں۔
مزید پڑھیں:
شمالی کوریا پر پابندی جاری رہے گی:ٹرمپ
امریکی محکمہ خارجہ کے مطابق سوڈان نے اسامہ بن لادن کو اس وقت تقریبا پانچ سال تک پناہ دی تھی جب وہ امریکہ میں شدت پسندانہ حملوں میں ملوث تھے، جس کی وجہ سے 1993 میں امریکہ نے سوڈان کو دہشت گردی کے اسٹیٹ اسپانسرز کی فہرست میں شامل کر دیا تھا۔
