گیا میں پنچایت انتخابات دس مرحلے میں ہوں گے

ریاست بہار کے ضلع گیا میں دس مرحلے میں پنچایت انتخابات منعقد ہوں گے۔ اس انتخابات میں 25 لاکھ امیدواروں کی قسمت کا فیصلہ کیا جائے گا۔ نکسل متاثر علاقوں میں انتخاب منعقد کرانا پولیس کے لیے بڑا چیلنج ہے۔

ضلع میں پنچایت انتخابات کا نوٹیفکیشن جاری کردیا گیا ہے۔ ضلع میں کل دس مرحلے میں انتخابات منعقد ہوں گے۔ پہلے مرحلے کے لیے 24 ستمبر کو بیلاگنج و خضر سرائے بلاکس میں ووٹنگ ہوگی۔ وہیں، دسویں مرحلے میں یعنی آٹھ دسمبر کو بارہ چٹی اور موہن پور کے پنچایتوں میں ووٹنگ ہوگی۔

ڈسٹرکٹ مجسٹریٹ ابھشیک کمار سنگھ نے کہا کہ اس مرتبہ کا پنچایت انتخابات گذشتہ پنچایت انتخابات کے مقابلے مختلف ہوگا کیونکہ پہلی مرتبہ بہار الیکشن کمیشن کی طرف سے پنچایت انتخابات میں دو عہدوں کو چھوڑ کر بقیہ تمام عہدے کے لیے ای وی ایم مشین سے ووٹنگ ہوگی، جس میں ضلع پریشد، مکھیا، پنچایت سمیتی اور وارڈ ممبر شامل ہیں جبکہ پنچ اور سرپنچ کی ووٹنگ بیلٹ پیپر سے ہوگی، اس مرتبہ کل 320 پنچایتوں کے لیے انتخاب ہونگے۔

واضح رہے کہ ضلع میں پہلے 332 پنچایت تھے تاہم اس مرتبہ نگر پنچایت میں بارہ پنچایت کے شامل ہونے کی وجہ سے یہ تعداد کم ہوکر 320 ہوگئی ہے. ضلع گیا میں کل چوبیس بلاک ہیں جس میں 25 لاکھ 28 ہزار 450 ووٹرز ووٹ کریں گے، اس مرتبہ 4871 ای وی ایم مشین لگیں گی جبکہ کل 4588 ووٹنگ مراکز ہیں۔

اس موقع پر ڈی ایم نے کہا کہ الیکشن کمیشن کی ہدایت کے مطابق انتخابات پرامن ماحول میں منعقد ہوں گے، جس کے لیےافسران اور ملازمین کو تربیت دی گئی ہے۔