سمڈیگا: جھارکھنڈ کے سمڈیگا میں ماب لنچنگ Mob Lynching In Simdega میں گاؤں والوں نے سنجو پردھان نام کے ایک شخص کو زندہ جلا دیا۔ یہ واقعہ کولیبیرا تھانہ حلقے کے بیسراجرا بازار کے پاس پیش آیا۔ تھانہ انچارج رامیشور بھگت نے بتایا کہ گاؤں والوں کا الزام ہے کہ سنجو جنگل سے درخت کاٹ کر فروخت کرتا تھا۔ ذرائع کے مطابق یہ تنازع ایک مخصوص درخت کاٹنے کی وجہ سے شروع ہوا جو ایک مقامی کمیونٹی میں مقدس مانا جاتا ہے۔ اسی وجہ سے گاؤں والوں نے اس شخص کو زندہ جلا ڈالا۔
ماب لنچنگ کی یہ واردات Jharkhand Mob Lynching منگل کی دوپہر تقریباً ڈھائی بجے انجام دی گئی۔ سنجو پردھان اسی گاؤں کا رہنے والا تھا جہاں یہ واقعہ سامنے آیا ہے۔ گاؤں والوں کا الزام ہے کہ سنجو پردھان ہر روز جنگل سے درخت کاٹتا تھا، اسے کئی بار درخت کاٹنے سے منع کیا گیا، لیکن اس نے درخت کاٹنے کا کام جاری رکھا۔ اس واردات کو انجام دینے سے پہلے گاؤں میں میٹنگ کر کے سنجو کو سبق سکھانے کا فیصلہ کیا گیا، جس کے بعد گاؤں والے بھیڑ کی شکل میں سنجو کے گھر گئے، اسے گھر سے کھینچ کر باہر نکالا اور بے دردی سے مارا پیٹا اور پھر اسے زخمی حالت میں زندہ جلا دیا۔
واقعہ کی اطلاع ملتے ہی کولیبیرا پولیس موقع پر پہنچ گئی، لیکن سینکڑوں مشتعل افراد کے ہجوم نے پولیس کو گاؤں میں داخل نہیں ہونے دیا۔ اس وقت وہاں موجود پولیس فورس کے لیے بھیڑ کو سنبھالنا ممکن نہیں تھا، جس کے بعد موقع پر 4 تھانوں کی پولیس بلائی گئی۔ اس کے بعد پولیس گاؤں میں داخل ہوئی اور ہجوم کو منتشر کیا۔ حالانکہ اس وقت تک کافی دیر ہو چکی تھی لیکن پولیس کے ساتھ پہنچنے والی فائر بریگیڈ کی گاڑی کی مدد سے آدھی جلی ہوئی لاش کو نکال لیا گیا۔
اس واقعے کے دوران سنجو کے گھر والے بھیڑ سے بار بار وہاں اسے چھوڑنے کی التجا کرتے رہے، لیکن گھر والوں کے گڑگڑانے اور فریاد کرنے پر بھی گاؤں والوں کا دل نہ پگھلا اور سنجو کو بے رحمی سے قتل کر دیا۔ واقعے کے بعد سے پولیس علاقے میں ڈیرہ ڈالے ہوئے ہے۔ اس واقعہ سے سنجو کے اہل خانہ خوف و ہراس میں مبتلا ہیں۔ وہیں، اس خوفناک واردات کے بعد سے گاؤں میں خاموشی چھائی ہوئی ہے۔
مزید پڑھیں:
واضح رہے کہ جھارکھنڈ اسمبلی میں ہجومی تشدد اور ماب لنچنگ کے خلاف حال ہی میں بل Anti Mob Lynching Bill پاس کیا گیا ہے، جس میں اس طرح کی واردات انجام دینے اور قصوروار پائے جانے کے پر عمر قید کی سزا کا التزام کیا گیا ہے۔ ماضی میں بھی جھارکھنڈ میں ماب لنچنگ کی واردات ہوتی رہی ہیں۔ تاہم، ریاست میں اینٹی ماب لنچنگ بل Anti Mob Lynching Bill پاس ہونے کے بعد یہ پہلا معاملہ ہے، جس میں ایک غیر مسلح شخص کو ہجوم کی طرف سے پیٹ پیٹ کر مار دیا گیا اور پھر اسے جلا دیا گیا۔
