مغربی بنگال میں تقریباً دو برس بعد کلکتہ فٹبال لیگ 2021 کے ذریعہ مغربی بنگال میں کھیل کود کی سرگرمیاں دوبارہ بحال ہو گئی ہیں۔ ریاست کے مختلف اضلاع کے اسٹیڈیموں، گراؤنڈز اور اسپورٹز اکیڈمیوں میں کھیل کود کی سرگرمیاں دوبارہ بحال ہو گئی ہیں، جس سے میدان میں چہل پہل واپس لوٹ آئی۔
اسی درمیان محمڈن اسپورٹنگ کی ٹیم کلکتہ فٹبال لیگ 2021 اور ڈورنڈ کپ میں اپنی موجودگی کا احساس دلانے کے لیے سخت ٹریننگ میں مصروف ہے۔ بھارتی فٹبال کے قدیم ترین فٹبال کلبوں میں سے ایک محمڈن اسپورٹنگ کے کھلاڑی روسی کوچ آیندریو چینسکیوا کی نگرانی میں سخت ٹریننگ میں مصروف ہیں۔ سیاہ سفید جرسی والی محمڈن اسپورٹنگ کی ٹیم کے روسی کوچ آیندریو چینسکیوا کلکتہ فٹبال لیگ 2021 اور ڈورنڈ کپ میں اپنی ٹیم کی عمدہ کارکردگی کے لئے پرعزم ہیں۔ ان کی ٹیم کلکتہ فٹبال لیگ 2021 چیمپئن شپ کی دوڑ میں سب سے آگے ہے اور اسی عزم کو لیگ کے اختتام تک برقرار رکھنا ہے۔
یہ بھی پڑھیں:
کلکتہ فٹبال لیگ 2021: بھوانی پور ایف سی شکست سے بچنے میں کامیاب
گزشتہ روز بھارتی قومی فٹبال ٹیم کے ہاتھوں شکست کے باوجود محمڈن اسپورٹنگ کی ٹیم میں کوئی کمی نہیں ہے اور کلکتہ فٹبال لیگ کے تمام میچوں میں جیت درج کرکے چیمپئن بن سکتی ہے۔ دوسری طرف بھارتی قومی فٹبال ٹیم کے چیف کوچ ایگور اسٹیموک نے کولکاتا میں نیپال کے خلاف ہونے والے بین الاقوامی نمائشی میچ کے لئے بھارتی ٹیم کا اعلان کرتے ہوئے کہا کہ ان کی تربیت یافتہ بھارتی ٹیم اچھی ہے۔
انہوں نے کہا کہ بین الاقوامی نمائشی میچ سے پہلے محمڈن اسپورٹنگ کے خلاف دوستانہ مقابلے میں بھارتی ٹیم کی کارکردگی توقع کے مطابق رہی ہے۔ نیپال کے خلاف ہونے والے بین الاقوامی نمائشی میچ میں شاندار کارکردگی کی امید ہے۔
