نئی دہلی: دہلی کے نائب وزیر اعلی منیش سسودیا کو اتوار کو ایکسائز پالیسی کیس میں تقریباً 8 گھنٹے کی پوچھ گچھ کے بعد سی بی آئی نے گرفتار کر لیا۔ اس معاملے میں بی جے پی اور عآپ دونوں ایک دوسرے کے خلاف بدعنوانی کا الزام لگا رہے ہیں۔ یہ بھی دعوی کیا جاتا ہے کہ بی جے پی کیجریوال کی پارٹی سے خوفزدہ ہے۔ وہیں اس معاملے میں سی بی آئی نے ایک سرکاری بیان جاری کیا ہے۔
سی بی آئی نے اپنے سرکاری بیان میں کہا کہ انہوں نے دہلی کے نائب وزیر اعلیٰ کو جی این سی ٹی ڈی کی ایکسائز پالیسی کی تشکیل اور اس کے نفاذ میں مبینہ بے ضابطگیوں سے متعلق ایک معاملے کی تحقیقات کے لئے بلایا گیا تھا۔ سی بی آئی نے بیان میں کہا ہے کہ ڈپٹی چیف منسٹر اور انچارج ایکسائز منسٹر سمیت 14 دیگر کے خلاف مقدمہ درج کیا گیا تھا تاکہ سال 2021-22 کے لئے ایکسائز پالیسی کی تشکیل اور اس کے نفاذ میں مبینہ بے ضابطگیوں اور پوسٹ ٹینڈر کے فوائد میں توسیع کے معاملے کی تحقیقات کی جا سکیں۔
انہوں نے کہا کہ ممبئی کی ایک پرائیویٹ کمپنی اور اس وقت کے سی ای او سمیت دیگر چھ افراد کے خلاف 19.02.2023 کو چارج شیٹ داخل کی گئی ہے۔ انہوں نے بتایا کہ ڈپٹی چیف منسٹر کو تحقیقات میں تعاون کے لیے 41A Cr.P.C کے تحت نوٹس جاری کیا گیا تھا۔ تاہم انہوں نے اپنی مصروفیات کا حوالہ دیتے ہوئے ایک ہفتے کا وقت مانگا تھا۔ ان کی درخواست کو قبول کرتے ہوئے آج انہیں تفتیش کے لئے بلایا گیا تھا۔
یہ بھی پڑھیں: Delhi Liquor Scam شراب بدعنوانی معاملے میں دہلی کے نائب وزیراعلیٰ منیش سسودیا گرفتار
سی بی آئی کے مطابق کیس کی تفتیش کے دوران جمع ہونے والے شواہد پر ڈپٹی چیف منسٹر نے ٹال مٹول سے جواب دیا اور اس کے برعکس انہوں نے تحقیقات میں تعاون نہیں کیا۔ اس لیے انہیں گرفتار کر لیا گیا ہے۔ گرفتار ملزمان کو نامزد عدالت، دہلی کے سامنے پیش کیا جائے گا۔ مزید تفتیش کی جا رہی ہے۔
