سرینگر (جموں و کشمیر): گزشتہ ہفتے ایک اہم بیان میں مرکزی وزیر داخلہ امیت شاہ نے جموں کشمیر میں سلامتی کی بہتر صورتحال کا حوالہ دیتے ہوئے یونین ٹیریٹری سے آرمڈ فورسز اسپیشل پاورز ایکٹ ( افسپا) کو منسوخ کرنے کے امکان کا اشارہ دیا۔ یہ اقدام زمینی سطح پر لاگو ہوتے ہی خطے کے سیکورٹی منظر نامے میں ایک اہم تبدیلی کی نشاندہی کر سکتا ہے، جو کہ گزشتہ قریب چار دہائیوں سے عسکریت پسندی اور علیحدگی پسندی کی زد میں ہے۔
یہ اشارہ چیف الیکشن کمشنر راجیو کمار کے حالیہ اعلان کے پس منظر میں آیا ہے کہ جموں و کشمیر میں اسمبلی اور پارلیمانی انتخابات کا انعقاد فی الحال سیکورٹی خدشات کی وجہ سے ناممکن ہے۔ کمار نے یونین ٹیریٹری میں انتخاب لڑنے والے امیدواروں کی بھیڑ کو سیکورٹی فراہم کرنے کے لاجسٹک چیلنجوں پر روشنی ڈالتے ہوئے اضافی سیکورٹی فورسز کی ضرورت کا بھی حوالہ دیا، جو فی الحال دستیاب نہیں ہیں۔
سال 2018 میں بھارتیہ جنتا پارٹی (بی جے پی) نے محبوبہ مفتی کی قیادت والی بی جے پی - پی ڈی پی مخلوط سرکار سے حمایت واپس لی جس کے بعد یہاں صدر راج نافذ العمل ہے۔ سال 2019 میں ریاست جموں کشمیر کو مرکز کے زیر انتظام علاقہ (یونین ٹیریٹری) بنا دیا گیا، گزشتہ چھ برسوں سے بھی زائد عرصہ سے منتخب سرکار سے محروم ہے، چھ برسوں سے یو ٹی اسمبلی انتخابات کا انتظار کر رہی ہے۔
سیکورٹی کے منظر نامے کا تجزیہ کرتے ہوئے، جموں و کشمیر پولیس کے اعداد و شمار سے گزشتہ دہائی کی ایک بھیانک تصویر سامنے آتی ہے۔ مئی 2014 میں جب سے نریندر مودی نے بھارت کے 14ویں وزیر اعظم کے طور پر عہدہ سنبھالا ہے، اس خطے میں تشدد کے 1276 واقعات ہوئے ہیں، جن کے نتیجے میں 349 شہری، 583 سیکورٹی اہلکار اور 1708 عسکریت پسند ہلاک ہوئے، جس کا مطلب کل 2640 ہلاکتیں ہوئی ہیں۔ سال 2018 میں سب سے زیادہ اموات ریکارڈ کی گئیں، جس میں 452 افراد اپنی جانیں گنوا بیٹھے، جن میں 271 عسکریت پسند، 95 سیکیورٹی اہلکار اور 86 عام شہری شامل تھے۔
تاہم حالیہ رجحانات سے امید کی ایک کرن ابھرتی نظر آ رہی ہے، 2021 سے تشدد میں بتدریج کمی کے ساتھ 2021 میں، 274 ہلاکتیں رپورٹ ہوئیں، جن میں زیادہ تر عسکریت پسند (193)، اس کے بعد سیکورٹی فورسز کے اہلکار (45) اور عام شہری (36) ہلاک ہوئے تھے۔ یہ رجحان 2022 میں جاری رہا، جس میں 186 عسکریت پسندوں کی ہلاکتیں، 30 شہریوں کی ہلاکتیں، اور 30 سیکیورٹی اہلکاروں کی ہلاکتیں ہوئیں۔ قابل ذکر بات یہ ہے کہ 2023 میں مزید کمی دیکھنے میں آئی، جس میں 72 تشدد کے واقعات میں 87 عسکریت پسند، 33 سیکورٹی اہلکار اور 12 شہری اپنی جانیں گنوا بیٹھے۔ 2024 کے پہلے سہ ماہی میں ہلاکتوں کی کم سے کم تعداد دیکھی گئی ہے جو کہ تشدد میں کمی کے ممکنہ رجحان کی نشاندہی کرتا ہے۔
یہ بھی پڑھیں: افسپا ہٹانے کے بعد کیا سی آر پی ایف، فوج کی جگہ لے سکتی ہے؟ - AFSPA Removal from Kashmir
تاہم ان پیش رفتوں کے درمیان کشمیر میں ٹارگٹ کلنگ کے حوالے سے خدشات برقرار ہیں۔ مارچ 2022 سے اب تک ٹارگٹ کلنگ کے 25 واقعات رپورٹ ہوئے ہیں جس کے نتیجے میں عسکریت پسندوں کے ہاتھوں 10 غیر کشمیری، 11 کشمیری مسلمان اور چار کشمیری پنڈت مارے گئے ہیں۔
