سرینگر (جموں و کشمیر): مرکزی سرکار نے جموں و کشمیر میں مجموعی طور پر 635 نیم فوجی دستوں کی اضافی کمپنیز کی تعیناتی کا اعلان کیا ہے۔ یہ انکشاف 36 ریاستوں اور مرکز کے زیر انتظام خطوں میں 3400 کمپنیز تعینات کرنے کے ایک عظیم منصوبے کے ایک حصے کے طور پر سامنے آیا ہے، جن میں سے 50 فیصد سے زائد کمپنیز مغربی بنگال، جموں و کشمیر اور چھتیس گڑھ جیسے حساس علاقوں میں تعینات کی جائیں گی۔
سرکاری ذرائع کے مطابق، سبھی ریاستوں اور مرکز کے زیر انتظام علاقوں کے چیف الیکٹورل افسران نے انتخابات سے متعلق معاملات کو سنبھالنے کے لیے فوری طور پر سینٹرل آرمڈ پولیس فورس (سی اے پی ایف) کی تعیناتی کی درخواست کی ہے۔ ان کمپنیز کی ذمہ داریوں میں انتخابات کے دوران علاقوں میں اعتماد سازی کے اقدامات، پولنگ کے دن کی سرگرمیاں، ای وی ایم (الیکٹرانک ووٹنگ مشینوں) اور گنتی کے مراکز Counting Centresکی حفاظت شامل ہے۔
ای ٹی وی بھارت کے ذریعے حاصل کردہ تفصیلی معلومات کے مطابق آزادانہ، منصفانہ اور پر امن انتخابات کے انعقاد کو یقینی بنانے کے لیے سی اے پی ایف کی زیادہ سے زیادہ 3400 کمپنیاں مرحلہ وار طریقے پر ملک بھر میں تعینات کی جائیں گی۔ صورتحال کے جائزے کے بعد طے کیا گیا ہے کہ مغربی بنگال میں 920 کمپنیز، جموں و کشمیر میں 635، اور چھتیس گڑھ میں 360 کمپنیز کی تعیناتی کو منظوری دی گئی ہے۔ ان علاقوں میں اہلکاروں کی تعیناتی دیگر ریاستوں اور مرکزی زیر انتظام خطوں کے مقابلے میں سب سے زیادہ ہے۔
افسران کا کہنا تھا کہ ’’جموں و کشمیر میں سی اے پی ایف ایس کی اضافی 36 کمپنیز تعینات ہوں گی، جو خاص طور پر مجموعی طور پر گنتی کے مراکز کی حفاظت کریں گی۔ جبکہ اے ڈی جی پی (امن و قانون) اور چیف الیکٹورل آفیسر پانڈورنگ پولے کی نگرانی میں یو ٹی جموں کشمیر میں فورسز کے تال میل پر خصوصی توجہ مرکوز کی جائے گی۔‘‘ جاری کردہ حکمنامہ کے مطابق ریلوے بورڈ کے چیئرمین کو ہدایت دی گئی ہے کہ وہ ریل گاڑیوں میں رولنگ اسٹاک کے وافر اسٹاک کی مناسب سہولیات کو یقینی بنائیں تاکہ بغیر کسی پریشانی کے فورسز اہلکاروں کی انتخابی ڈیوٹی کے لیے بروقت نقل و حرکت کو یقینی بنایا جا سکے۔
مزید پڑھیں: Review Meeting on Kashmir Security: امت شاہ دہلی میں جموں و کشمیر سکیورٹی صورتحال کا جائزہ لیں گے
جموں و کشمیر انتظامیہ کے ایک سینئر افسر نے اس صورتحال پر روشنی ڈالتے ہوئے کہا: ’’ہم تمام متعلقہ محکموں کے ساتھ ایک جائزہ میٹنگ طلب کریں گے اور اسی طرح اہلکاروں کے لیے انتظامات بھی انجام دیئے جائیں گے۔‘‘ واضح رہے کہ جموں و کشمیر میں پانچ لوک سبھا نشستوں پر سیاسی لیڈران اپنی قسمت آزمائیں گے۔
