Rahul Gandhi Bike Trip : 18 వేల అడుగుల ఎత్తైన రహదారిపై రాహుల్ బైక్ రైడింగ్.. వీడియో చూశారా?

Rahul Gandhi Bike Trip : కాంగ్రెస్ అగ్రనేత రాహుల్​ గాంధీ లద్ధాఖ్​ పర్యటనలో ఉన్నారు. ఆయన లేహ్ జిల్లాలోని అందమైన ప్రదేశాలను సందర్శిస్తున్నారు. ఈ క్రమంలో ఖర్దూంగా లా పర్వత ప్రాంతాన్ని బైక్​ నడుపుకుంటూ వెళ్లి రాహుల్ సోమవారం సందర్శించారు. ప్రపంచంలోనే అత్యంత ఎత్తులో ఉన్న రహదారిగా ఖర్దూంగా లా కనుమ పేరు పొందింది. ఈ పర్వత ప్రాంతం సముద్ర మట్టానికి 17,582 అడుగుల ఎత్తులో ఉంది. ఈ ఫొటోలను చూసిన నెటిజన్లు రాహుల్​ మంచి స్టైలిష్ లుక్​లో ఉన్నారని ప్రశంసిస్తున్నారు. అలాగే మరికొందరు నెటిజన్లు రాహుల్ స్మార్ట్ అని, రేసర్​లా ఉన్నారంటూ కితాబిస్తున్నారు.

Rahul Gandhi Bike Ladakh : గత గురువారం(ఆగస్టు 17న) రాహుల్‌.. లేహ్‌ పర్యటనకు వచ్చారు. తొలుత రెండు రోజుల పాటే ఇక్కడ ఉండాలని భావించినా.. ఆగస్టు 25 వరకు తన పర్యటనను పొడిగించుకున్నారు. 2019లో ఆర్టికల్‌ 370ని రద్దు చేసిన తర్వాత లద్ధాఖ్‌లో రాహుల్​ పర్యటించడం ఇదే తొలిసారి. అగస్టు 20వ తేదీ తన తండ్రి ( రాజీవ్ గాంధీ) జయంతి సందర్భంగా ఆయన చిత్రపటానికి లద్ధాఖ్​లోని ప్యాంగాంగ్ సరస్సు వద్ద రాహుల్ నివాళులర్పించారు. ఈ క్రమంలో భారత భూభాగాన్ని  చైనా ఆక్రమిస్తోందని ఆరోపించారు. ప్రధాని మోదీ మాత్రం చైనా ఆక్రమణపై మాట్లాడరని విమర్శించారు.