Hyderabad Hotel Manager Shot Dead : ఉద్యోగం పోయిందనే కోపంలో.. హోటల్​ జనరల్‌ మేనేజర్‌పై కాల్పులు

Hyderabad Hotel Manager Shot Dead : హైదరాబాద్​లో మరోమారు కాల్పులు కలకలం సృష్టించాయి. మియాపూర్ పోలీస్ స్టేషన్ పరిధిలోని మదీనాగూడ సందర్శిని ఎలైట్ రెస్టారెంట్‌లో పనిచేస్తున్న 35 ఏళ్ల జనరల్ మేనేజర్ దేవేందర్ గాయన్​పై గుర్తు తెలియని వ్యక్తి కాల్పులు జరిపి పరారయ్యాడు. గాయపడిన దేవేందర్‌ను హోటల్‌ సిబ్బంది హుటాహుటిన ఆసుపత్రికి తరలించారు. బాధితుడు ఆసుపత్రిలో చికిత్స పొందుతూ మృతి చెందాడు. అయితే తాజాగా ఈ ఘటనలో పోలీసులు ఒకరిని అరెస్టు చేశారు.

Miyapur Firing Incident : విషయం తెలుసుకున్న పోలీసులు.. ఘటనా స్థలికి చేరుకుని ఆరా తీశారు. పోలీసులు, క్లూ టీమ్‌ అన్నీ వివరాలను సేకరించాయి. ఇప్పటికే ఘటనా స్థలిలో 6 తూటాలు స్వాధీనం చేసుకున్నారు. ఈ ఘటనపై దర్యాప్తు చేపట్టిన పోలీసులు.. కేసును కొద్ది గంటల్లోనే ఛేదించారు. 'నిందితుడిని రితీశ్​ నాయర్‌గా గుర్తించారు. కేరళకు చెందిన నిందితుడు రితీశ్​ నాయర్‌, దేవేందర్ గాయన్ గతంలో ఒకేచోట మేనేజర్లుగా పనిచేశారు. నెల రోజుల క్రితం ఇద్దరి మధ్య గొడవ చోటుచేసుకుంది. ఇదే క్రమంలో రితీశ్​, దేవేందర్​పై చేయిచేసుకున్నాడు. ఇదే విషయాన్ని హోటల్‌ యాజమాన్యానికి దేవేందర్ ఫిర్యాదు చేశాడు. దీంతో రితీశ్​ను యాజమాన్యం తొలగించింది. దేవేందర్ వల్లే ఉద్యోగం పోయిందని రితీశ్ అతడిపై​ కక్ష పెంచుకున్నాడు. 

Hyderabad Hotel Manager Shot Updates : బుధవారం రాత్రి దేవేందర్ విధులు ముగించుకుని ఇంటికి వెళ్లే సమయంలో రితీశ్​ రెక్కీ నిర్వహించి వెంట తెచ్చుకున్న కంట్రీ మేడ్ పిస్తోల్​తో అతనిపై ఐదు రౌండ్లు కాల్పులు జరిపాడు. తనని ఎవరూ గుర్తు పట్టకుండా తలకు హెల్మెట్‌ ధరించాడు. తీవ్ర గాయాలైన దేవేందర్​ ఆసుపత్రికి చేరేలోపే మృతి చెందాడు.' అని పోలీసులు తెలిపారు. దేవందర్ మృతదేహానికి గాంధీ ఆసుపత్రిలో పోస్టుమార్టం నిర్వహించిన అనంతరం కుటుంబసభ్యులకు అప్పగించనున్నారు. హత్యకు వాడిన తుపాకీని పోలీసులు స్వాధీనం చేసుకున్నట్లు సమాచారం. మృతుడికి భార్య ఇద్దరు పిల్లలు ఉన్నట్లు తెలుస్తోంది.