Anantnag Martyrs Last Rites : అమర జవాన్లకు ఘన నివాళులు.. దారిపొడవునా నిల్చుని పూలవర్షం

Anantnag Martyrs Last Rites : జమ్ముకశ్మీర్‌లోని అనంతనాగ్‌ జిల్లాలో ఉగ్రవాదులు జరిపిన కాల్పుల్లో అమరుడైన మేజర్ ఆశిష్ ధోనక్​కు ఘనంగా వీడ్కోలు పలికారు. తన స్వగ్రామమైన హరియాణాలోని బింజోల్‌లో బంధు మిత్రులు, గ్రామస్థుల ఆశ్రునయనాల మధ్య అంత్యక్రియలు నిర్వహించారు. మేజర్‌ను కడసారి చూసేందుకు చుట్టుపక్కల గ్రామాల నుంచి పెద్ద సంఖ్యలో ప్రజలు తరలివచ్చారు. దారిపొడవునా నిల్చుని 'భారత్​ మాతా కీ జై' అంటూ నినాదాలు చేశారు. విద్యార్థులు సైతం రోడ్డుకు ఇరువైపులా నిలబడి నినదించారు. అశిష్ ధోనక్ భౌతికకాయంపై జాతీయ జెండాను ఉంచిన సైన్యం గాల్లోకి కాల్పులు జరిపి అధికార లాంఛనాలతో అంత్యక్రియలను నిర్వహించింది. 

మరో సైనికుడు కర్నల్​ మన్​ప్రీత్ సింగ్​ భౌతిక కాయాన్ని స్వగ్రామానికి తరలించింది సైన్యం. పంచకులాలోని కమాండ్​​ ఆస్పత్రి నుంచి స్వగ్రామమైన మొహాలీకి తరలించారు. దారిపొడవునా నిల్చుని స్థానికులు నివాళులు అర్పించారు. అనంతనాగ్‌ జిల్లాలోని కొకర్‌నాగ్ ప్రాంతంలో ముష్కరులు జరిపిన కాల్పుల్లో మేజర్ అశిష్‌తో పాటు కర్నల్ మన్‌ప్రీత్‌ సింగ్‌, DSP హుమాయున్ భట్‌ ప్రాణాలు కోల్పోయారు.