వింటర్​లో కర్లీ హెయిర్ సంరక్షణ - ఇలా చేస్తేనే స్టైల్​గా ఉంటుంది!

Curly Hair Tips for Winter : మనం అందంగా కనిపించడంలో జుట్టుదీ కీలకపాత్రే అనడంలో ఎలాంటి సందేహం లేదు. అందుకే చాలామంది ముఖ్యంగా మహిళలు.. ఒత్తైన జుట్టు కోసం ఆరాటపడుతుంటారు. అయితే.. వాతావరణంలోని పలు మార్పుల వల్ల హెయిర్​పై ప్రతికూల ప్రభావం పడుతుంది. ఇక చలికాలంలోనైతే ఈ సమస్య మరింత తీవ్రంగా ఉంటుంది. ఈ చలిగాలులకు సాధారణ జుట్టే పొడిగా మారుతుంది. సాధారణ రోజుల్లోనే డ్రైగా అనిపించే కర్లీ హెయిర్(Hair Care).. వింటర్​లో మరింత పొడిబారిపోతుంది. ఫలితంగా చుండ్రు, చివర్లు చిట్లిపోవడం, జుట్టు బాగా ఊడిపోవడం.. వంటి పలు సమస్యలు తలెత్తుతాయి. మరి, ఈ కాలంలో వాటన్నింటి నుంచి దూరంగా ఉంటూ మీ అందాన్ని పెంచే రింగుల జుట్టును కాపాడుకోవడానికి సౌందర్య నిపుణులు సూచించిన కొన్ని చిట్కాలు పట్టుకొచ్చాం. అవేంటో ఈ స్టోరీలో తెలుసుకోండి.

• చలి కాలంలో బయటకు వెళ్లేటప్పుడు జుట్టును కవర్ చేసుకునేలా క్యాప్ ధరించడం, స్కార్ఫ్ కట్టుకోవడం మంచిది.
• వాతావరణం కూల్​గా ఉన్నప్పుడు సాధారణంగా నీళ్లు తాగాలనిపించదు. దాంతో తెలియకుండానే డీహైడ్రేషన్‌ సమస్య తలెత్తుతుంది. ఫలితంగా చర్మమే కాదు.. జుట్టూ తేమను కోల్పోయి పొడిబారిపోతుంది. అందుకే కర్లీ హెయిర్​ ఉన్నవారు తమ జుట్టును ఆరోగ్యంగా ఉంచుకోవాలంటే రోజూ తగినంత మొత్తంలో నీళ్లు తాగాలి.
• రోజులో కనీసం ఏడెనిమిది గంటలు నిద్రపోయేలా చూసుకోవాలి. తద్వారా ఒత్తిడి, ఆందోళనలు దూరమై.. ప్రశాంతత దరిచేరుతుంది.
• అప్పుడప్పుడూ కొన్ని చుక్కల హెయిర్ సీరమ్ రాసుకోవడం వల్ల కూడా.. చల్లటి వాతావరణం నుంచి కర్లీ హెయిర్‌ను కాపాడుకోవచ్చు.
• రింగుల జుట్టు ఉన్న వారు చివర్లు చిట్లే సమస్యతో బాధపడుతుంటారు. దానివల్ల వెంట్రుకలు నిర్జీవంగా కనిపిస్తాయి. కాబట్టి ప్రతి మూడు నెలలకోసారి చిట్లిన చివర్లను కత్తిరిస్తూ ఉండాలి.

• హెయిర్​కు తేమను అందించడంలో కలబంద చక్కగా పని చేస్తుంది. కాబట్టి వారానికి రెండుసార్లు కలబంద గుజ్జును జుట్టు కుదుళ్ల నుంచి చివర్ల వరకు పట్టించి.. 20 నిమిషాల తర్వాత తలస్నానం చేయడం వల్ల మంచి ఫలితం ఉంటుంది.
• జుట్టు తేమను కోల్పోకుండా చేయడంలో తేనె కూడా కీలక పాత్ర పోషిస్తుంది. అందుకే.. కండిషనర్లు, క్లెన్సర్‌లలో కాస్త తేనె కలుపుకొని అప్లై చేసుకుంటే జుట్టు పొడిబారకుండా జాగ్రత్తపడచ్చు.
• జుట్టు ఆరోగ్యాన్ని సంరక్షించడంలో నూనెల పాత్ర కూడా కీలకమే. అందుకే కొబ్బరి, బాదం, ఆలివ్.. వంటి అత్యవసర నూనెలతో తరచూ జుట్టుకు మసాజ్ చేయాలి.
• అయితే వింటర్​లో కర్లీ హెయిర్‌ను కాపాడుకోవడానికి గోరువెచ్చటి నూనెతో మసాజ్ చేయడం మంచిది.
• తలస్నానం చేయడానికి గంట లేదా రెండు గంటల ముందు ఈ చిట్కాను పాటించడం వల్ల జుట్టుకు చక్కటి పోషణ లభిస్తుంది.
• ఉపయోగించే నూనె ఏదైనా సరే.. దాన్ని అప్లై చేసుకునే ముందు కాస్త వేడి చేసుకోవడం మాత్రం మర్చిపోవద్దు.