Harish Rao on Suryapet Ragging Issue : సూర్యాపేట వైద్య కళాశాలలో జూనియర్ విద్యార్థఇపై ర్యాగింగ్ ఘటనకు సంబంధించి రాష్ట్ర వైద్య ఆరోగ్య శాఖ మంత్రి హరీశ్ రావు స్పందించారు. ర్యాగింగ్ విషయం తమ దృష్టికి వచ్చిందని తెలిపారు. ఘటనకు సంబంధించి పూర్తి వివరాలు సేకరించేందుకు ప్రత్యేక విచారణ కమిటీ ఏర్పాటు చేసినట్లు వెల్లడించారు. కమిటీ ఇవాళ నివేదిక ఇస్తుందన్న మంత్రి.. ర్యాగింగ్ జరిగినట్లు నిర్ధారణ అయితే బాధ్యులపై కఠిన చర్యలు తీసుకుంటామని స్పష్టం చేశారు.
ఇవాళే తేలుతుంది..
Harish Rao on Suryapet Student Ragging Issue : 'సూర్యాపేట వైద్య కళాశాలలో జరిగిన విషయం ప్రభుత్వం దృష్టికి వచ్చింది. ఈరోజు ఉదయాన్నే వైద్యవిద్య సంచాలకులు రమేశ్ రెడ్డికి ఆదేశాలు ఇచ్చాం. ఓ కమిటీని ఏర్పాటు చేశాం. ఈ కమిటీ ర్యాగింగ్ జరిగిందో లేదో అనే విషయాన్ని తేలుస్తుంది. ఇవాళ నివేదిక అందిస్తుంది. ఒకవేళ కమిటీ నివేదికలో ర్యాగింగ్ జరిగినట్లు తేలితే.. కఠిన చర్యలు తీసుకుంటాం. మరోసారి ఇలాంటి ఘటనలు పునరావృతం కాకుండా చేస్తాం.'
- హరీశ్ రావు, రాష్ట్ర వైద్య ఆరోగ్య శాఖ మంత్రి
ర్యాగింగ్ ఘటనపై విచారణ..
సూర్యాపేట వైద్య కళాశాలలో ర్యాగింగ్ కలకలంపై విచారణ జరుగుతోంది. వైద్య కళాశాల వసతిగృహంలో డీఎస్పీ మోహన్‌కుమార్ విచారణ చేస్తున్నారు. ఆరోపణలు ఎదుర్కొంటున్న 30 మంది విద్యార్థులను ఆరా తీస్తున్నారు. ర్యాగింగ్ ఘటనపై కేసు నమోదు చేసినట్లు డీఎస్పీ మోహన్‌కుమార్ వెల్లడించారు. ఆరుగురిపై కేసు నమోదు చేసినట్లు తెలిపారు. మొత్తం 6 సెక్షన్ల కింద కేసు నమోదు చేసినట్లు చెప్పారు.
