జహీరాబాద్లోని గజ్వేల్ రిజర్వ్ ఫారెస్ట్ని ఆనుకుని అరణ్య అగ్రికల్చర్ ఆల్టర్నేటివ్స్ సంస్థ పదెకరాల్లో విస్తరించి ఉంటుంది. అందులో నర్సన్న కొప్పుల, పద్మ దంపతులు పెర్మాకల్చర్కి సంబంధించిన పాఠాలు చెబుతారు. ఇది ఒక ప్రకృతి బడి. రసాయనాలకు, ప్లాస్టిక్కి దూరంగా ఉండే నేలపై... అంతటా పచ్చగా పరుచుకున్న వివిధ రకాల వృక్షాలు, స్వేచ్ఛగా అల్లుకున్న పొదలు, తృణధాన్యాల పంటలు, నేలసారాన్ని పెంచే నేస్తాలుంటాయి. మండే ఎండల్లో కూడా నిండుగా నీళ్లతో కనిపించే బావులు, పశువులు కనిపిస్తాయి. పెర్మాకల్చర్‌తో ఒనగూరే లాభాలు వివరించడానికి ‘అరణ్య’ఓ నమూనా!
శాశ్వతసాగు... పర్మాకల్చర్:
పర్మనెంట్‌, అగ్రికల్చర్ పదాల నుంచి వచ్చిన మాటే పర్మాకల్చర్. దీన్నే శాశ్వత సాగు విధానం అంటున్నారు. అర్థమయ్యేలా చెప్పాలంటే ప్రకృతితో చెలిమి చేస్తూ చేసే వ్యవసాయ విధానం. పాడిపంటలు అని పేరుకే అంటున్నాం కానీ ఇప్పటి రైతులు చాలామంది పాడికి దూరమయ్యారు. విత్తనాల కోసం, మందుల కోసం వేరొకరిపై ఆధారపడుతున్నారు. ప్రకృతి వైవిధ్యం కోల్పోడానికి కారణమవుతున్నారు. నష్టాల్లో కూరుకుపోతున్నారు. దీనికి వ్యతిరేకంగా మొదలైన ఉద్యమమే పెర్మాకల్చర్.
సేంద్రియ అరణ్య:
వ్యవసాయ రంగంలో చక్కని అనుభవం ఉండి, ప్రయోగాల దిశగా అడుగులు వేస్తున్న నర్సన్న 1989లో ఆస్ట్రేలియా వెళ్లి పర్మాకల్చర్‌ని అభ్యసించారు. అందరినీ ఆ విధానంవైపు మళ్లించాలన్నది ఆయన లక్ష్యం. జహీరాబాద్లోని బిడకన్నె ప్రాంతంలో 1999లో పదెకరాల బీడు భూమిని ఎన్నుకుని పర్మా విధానంలో వ్యవసాయం చేయడం మొదలుపెట్టారు. అదే ప్రస్తుతం సేంద్రియ ‘అరణ్య’గా మారింది. ఆ అనుభవాలే కొన్ని వేల మందికి పాఠాలయ్యాయి.
పెర్మాకల్చర్ కోసం భూసంరక్షణ, ప్రజల సంరక్షణ, న్యాయమైన వాటా విలువలను పాటించాలని నిర్ణయించారు.
ఆ 5 సూత్రాలను అనుసరించాలి
- ప్రకృతిని గమనించు. అది మనకు అనేక శక్తులని ఇస్తుంది. వాటిని ఒడిసిపట్టాలి...
- తక్కువ పనితో ఎక్కువ ఫలితాలు. ఒక మొక్కకు నీరు పోస్తుంటే దాని వల్ల ఇతర జీవావరణ వ్యవస్థలకూ నీరు పోసినట్టే...
- వృథా కానివ్వద్దు. ఏది ఎంత అవసరమో అంతే తీసుకోవడం వల్ల వనరులను కాపాడినట్లే...
- వైవిధ్యమే మనకు రక్షణ... పంట నుంచి ప్రతి వినియోగం వరకు సృజనాత్మకత చూపాలి...
- ముందు నువ్వు ఆచరించు. తర్వాత నీ కుటుంబాన్ని ప్రోత్సహించు. ఆ తర్వాత సమాజానికి తెలియపరుచు...
అరెకరం భూమి ఉన్నా చాలు మనకి కావాల్సిన కాయగూరలు, ధాన్యాలు, పప్పులు, పాడిని పొందొచ్చు. ఆహారభద్రత, ఇంధన భద్రత పొందవచ్చంటున్నారు నర్సన్న దంపతులు. వీరి ఆలోచనతో ఉత్తేజితులైన కొందరు ప్రకృతి ప్రేమికులు కూడా... తమ భూమిని కూడా సేంద్రియమయం చేసుకుంటూ పర్మాకల్చర్ విధానంలోకి అడుగు పెడతామంటున్నారు.
ఇవీ చూడండి: కన్నెపల్లి పంపుహౌస్ నుంచి విడుదలైన జీవధార
