కేంద్రం తీసుకొచ్చిన కొత్త వ్యవసాయ చట్టాలను ఉపసంహరించుకోవాలంటూ ఖమ్మం సీపీఐ నాయకులు పాదయాత్ర చేపట్టారు. ఆ పార్టీనేత కర్నాటి భానుప్రసాద్ ఆధ్వర్యంలో రైతులు వినూత్నంగా నిరసన తెలిపారు. చేతులకు బేడీలు వేసుకుని, మెడకు ఉరితాళ్లు బిగించుకుని, పురుగు మందుల డబ్బాలతో ఆందోళన నిర్వహించారు.
జిల్లాలోని నేలకొండపల్లి నుంచి కలెక్టరేట్ వరకు పాదయాత్ర చేశారు. కేంద్రం తీసుకొచ్చిన వ్యవసాయ చట్టాలను రద్దు చేయాలని సీపీఐ రాష్ట్ర కార్యవర్గ సభ్యుడు బాగం హేమంతరావు డిమాండ్ చేశారు. కార్పొరేట్ల కోసం రైతులకు అన్యాయం చేయటం సరైంది కాదన్నారు. చట్టాలను ఉపసంహరించుకునే వరకు ఉద్యమాన్ని కొనసాగిస్తామని సీపీఐ నాయకులు స్పష్టం చేశారు.
