CM KCR Election Campaign Today 2023 : ముఖ్యమంత్రి కేసీఆర్(CM KCR) ఎన్నికల ప్రచారంలో దూసుకుపోతున్నారు. అందరికంటే ముందుగా అభ్యర్థులని ప్రకటించి.. భీ ఫారాలు అందించిన గులాబీ దళపతి రోజుకు రెండేసి సభలతో.. నియోజకవర్గాల్లో సుడిగాలి పర్యటన చేయనున్నారు. ఆదివారం హుస్నాబాద్లో ఎన్నికల ప్రచార సభలో పాల్గొన్న సీఎం.. ఇవాళ జనగామ, భువనగిరి సభల్లో పాల్గొంటున్నారు. మేనిఫెస్టోలో పేర్కొన్న అంశాలను వివరించడంతో పాటు పదేళ్లలో చేసిన అభివృద్ధి.. బీఆర్ఎస్(BRS) మరోసారి అధికారం చేపట్టాల్సిన ఆవశ్యకతను.. ముఖ్యమంత్రి ఆయా సభల్లో వివరించనున్నారు. ప్రతిపక్షాలు లక్ష్యంగా విమర్శనాస్త్రాలు సంధిస్తారని స్థానిక గులాబీ నేతలు పేర్కొంటున్నారు.
CM KCR Election Campaign Vehicle : ఎన్నికలకు కేసీఆర్ ప్రచారరథం సిద్ధం.. హుస్నాబాద్లో తొలి శంఖారావం
CM KCR Election Campaign in Jangaon : తొలుత ముఖ్యమంత్రి కేసీఆర్.. జనగామ వికాస్‌నగర్‌లోని వైద్యకళాశాల మైదానంలో జరిగే బహిరంగ సభలో పాల్గొంటారు. ముఖ్యమంత్రితో పాటు జిల్లా మంత్రులు ఇతర నాయకుల కోసం.. భారీ వేదిక సిద్ధం చేశారు. ఇటీవలే కాంగ్రెస్‌కు రాజీనామా చేసిన మాజీమంత్రి, పీసీసీ పూర్వ అధ్యక్షుడు పొన్నాల లక్ష్యయ్య సీఎంతో కలసి సభలో పాల్గొంటారు. ఉమ్మడి వరంగల్ జిల్లాలో నిర్వ హించే తొలి సభను గులాబీ సేనలు ప్రతిష్ఠాత్మక్మంగా తీసుకొని జనసమీకరణ చేస్తున్నారు. బీఆర్ఎస్ అభ్యర్ధి పల్లా రాజేశ్వరరెడ్డి అన్ని మండలాల్లో సన్నాహాక సమావేశాలు నిర్వహించి ప్రజలను రప్పించే ప్రయత్నం చేశారు. ఈసారి వంద సీట్లలో గులాబీ గెలుపు ఖాయమని ధీమాగా చెప్పారు.
"బీఆర్ఎస్ పార్టీ దేశంలోనే అతి పెద్ద సభలు పెట్టే అనుభవం ఉంది. వరంగల్ ఉమ్మడి జిల్లాలో జనగామలో సభను నిర్వహించేందుకు అవకాశం ఇచ్చారు. ప్రపంచంలో అతిపెద్ద సభను పెట్టింది కూడా వరంగల్ ప్రకాశ్ నగర్లోనే. సభలకు సంబంధించిన ఏర్పాట్లు చేశాం. ఎటువంటి ఇబ్బంది లేదు. లక్ష మందికి వచ్చిన సరిపోయే విధంగా ఏర్పాట్లు చేశాం. కుర్చీలు అధికంగా ఏర్పాటు చేశాం. రవాణా ఏర్పాటు చేశాం. మూడోసారి 100 సీట్లు కచ్చితంగా వస్తాయి."- పల్లా రాజేశ్వరరెడ్డి, జనగామ బీఆర్ఎస్ అభ్యర్ధి
CM KCR Election Campaign in Bhuvanagiri : అనంతరం భువనగిరి(Bhuvanagiri) జూనియర్‌ కళాశాల మైదానంలో ఏర్పాటు చేసే బహిరంగ సభలో సీఎం కేసీఆర్ పాల్గొని ప్రసంగిస్తారు. భారీగా జనం తరలివచ్చేలా.. ఎమ్మెల్యే పైళ్ల శేఖర్‌రెడ్డి విస్తృత ఏర్పాట్లు చేశారు. బీఆర్ఎస్ అభ్యర్థులు.. సీఎం కేసీఆర్ సభలను ప్రతిష్ఠాత్మకంగా తీసుకుంటున్నారు. ఈనెల 26 నుంచి 31 మధ్య.. మునుగోడు, కోదాడ, తుంగతుర్తి, ఆలేరు, హుజూర్‌నగర్‌, మిర్యాలగూడ, దేవరకొండ నియోజకవర్గాల్లో జరిగే సభల్లోనూ పాల్గొననున్నారు. నామినేషన్ల తర్వాత సూర్యాపేట, నకిరేకల్‌, నల్గొండ, నాగార్జునసాగర్‌ నియోజకవర్గాల్లో కేసీఆర్ సభలు జరుగనున్నాయి. సీఎం పర్యటన దృష్ట్యా.. రాచకొండ సీపీ డీఎస్ చౌహాన్ ఏర్పాట్లు పరిశీలించారు. ఎలాంటి సమస్యలు తలెత్తకుండా పటిష్ఠ చర్యలు తీసుకోవాలని సిబ్బందికి సూచించారు.
