పీఆర్సీ సిఫారసులను ఎట్టి పరిస్థితుల్లోనూ అంగీకరించేది లేదని ఐక్య ఉపాధ్యాయ సంఘం (యూటీఎఫ్) స్పష్టం చేసింది. ఫిట్మెంట్ 45 శాతానికి దగ్గరగా ఉంటేనే అంగీకరిస్తామని తేల్చి చెప్పింది. సచివాలయంలో ప్రభుత్వ ప్రధాన కార్యదర్శి కమిటీతో సమావేశమైన యూటీఎఫ్ నేతలు.. కమిటీ తమ వాదనలు వినడం కంటే నచ్చజెప్పే ప్రయత్నమే చేశారని వ్యాఖ్యానించారు. కరోనా పరిస్థితుల్లో ఆదాయం తగ్గిపోయిందని.. నాలుగైదేళ్లు కోలుకునే పరిస్థితి లేదని సమర్థించుకునే ప్రయత్నం చేశారని నేతలు అసంతృప్తి వ్యక్తం చేశారు.
పీఆర్సీ నివేదిక బాగానే ఉందనే అభిప్రాయం ఆమోదనీయం కాదని నేతలు ఆవేదన వ్యక్తం చేశారు. మంచి ఫిట్మెంట్ ఇవ్వకపోతే తమ కార్యాచరణ ప్రకటిస్తామన్నారు. గ్రాట్యుటీ రూ. 20 లక్షలకు పెంచాలని.. కనీస వేతనం రూ. 24 వేలుగా పరిగణించాలని సీఎస్ కమిటీకి సూచించామని తెలిపారు. 2018 నుంచే ఆర్థిక ప్రయోజనాలు కల్పించాలని.. గురుకులాలకు పీఆర్సీ అమలు చేయాలని స్పష్టం చేశారు. పదవీ విరమణ వయసు పెంపు ఈ నెలలోనే అమలు చేయాలని, రాష్ట్రంలోని అన్ని సంఘాలను చర్చలకు పిలవాలని కమిటీని కోరినట్లు నేతలు వెల్లడించారు.
