వైద్య కోర్సుల్లో ప్రవేశాల కోసం దేశవ్యాప్తంగా నీట్ పరీక్ష ఆదివారం జరగనుంది. కరోనా పరిస్థితుల వల్ల గతంలో వాయిదా పడిన పరీక్షను నిర్వహించేందుకు నేషనల్‌ టెస్టింగ్‌ ఏజెన్సీ ఏర్పాట్లు చేసింది. దేశవ్యాప్తంగా 15 లక్షల 97 వేలు.. రాష్ట్రంలో 55,810 అభ్యర్థులు దరఖాస్తు చేసుకున్నారు. మాస్కులను అనుమతించాలని నిర్ణయించిన జాతీయ పరీక్షల సంస్థ.. బూట్లు, ఎలక్ట్రానిక్ పరికరాలు, కొన్ని ఆభరణాలకు అనుమతి లేదని స్పష్టం చేసింది.
గదికి 12మంది మాత్రమే..
ఈ ఏడాది కరోనా నేపథ్యంలో గతంలో వాయిదా పడిన నీట్.. మళ్లీ వాయిదా పడుతుందా.. కొనసాగుతుందా అనే ఉత్కంఠ చివరి వరకు కొనసాగింది. కొవిడ్ నివారణ జాగ్రత్తలన్నీ తీసుకున్నట్లు ఎన్టీఏ వెల్లడించింది. గత ఏడాది దేశవ్యాప్తంగా 2,546 పరీక్ష కేంద్రాలు ఉండగా.. భౌతిక దూరం పాటించేందుకు.. ఈసారి 3,840 కేంద్రాలను ఏర్పాటు చేసింది. ఒక గదిలో గతంలో 24 మంది విద్యార్థులు పరీక్ష రాయగా.. ఈ ఏడాది 12 మంది మాత్రమే ఉండేలా జాగ్రత్తలు తీసుకొంది.
మాస్కు తప్పనిసరి...
రాష్ట్రంలో గత ఏడాది 54,730 మంది కోసం 79 పరీక్ష కేంద్రాలను ఏర్పాటు చేయగా.. ఈ ఏడాది 55,810 మంది అభ్యర్థుల కోసం 112 కేంద్రాలను సిద్ధం చేసింది. విద్యార్థులు కచ్చితంగా మాస్కు ధరించాలని స్పష్టం చేసింది. చేతి గ్లౌజ్లు, పేస్షీల్డ్ కూడా అనుమతిస్తామని పేర్కొంది. పరీక్ష కేంద్రాల వద్ద థర్మల్ స్క్రీనింగ్, శానిటైజర్ ఏర్పాట్లను చేసింది. అక్టోబర్లో ప్రవేశాల ప్రక్రియ జరగనుంది.
ఇవీచూడండి: మెయిన్స్లో మెరిసిన యశశ్చంద్ర.. ముంబయి ఐఐటీలో సీటే లక్ష్యం
