తెలంగాణలో కరోనా కేసులు వేగంగా పెరుగుతున్న నేపథ్యంలో బాధితుల కోసం అన్ని ఆసుపత్రుల్లో ప్రత్యేక పడకలు ఏర్పాటు చేయాలని రాష్ట్ర వైద్యారోగ్య ఐకాస కోరింది. ఈ మేరకు ఐకాస నాయకులు హైదరాబాద్ కోఠిలోని వైద్య విద్యా సంచాలకుల కార్యాలయంలో ఆ శాఖ మంత్రి ఈటల రాజేందర్తో సమావేశమై పలు అంశాలను చర్చించారు.
కొవిడ్ -19 ఐసోలేషన్ ఆసుపత్రులను పూర్తిగా కరోనా వైద్యశాలలుగా మార్చి... పాజిటివ్ కేసులున్నవారిని అక్కడే చికిత్స అందించాలని ఐకాస ఛైర్మన్ కోరారు. వైరస్ బాధితులకు వైద్య సేవలు అందిస్తున్న వైద్యులకు వారం నుంచి పది రోజుల క్వారంటైన్ ఇవ్వాలన్నారు. వైద్యుల కుటుంబాలకు కరోనా సోకకుండా తమకు వసతిని ఏర్పాటు చేయాలని మంత్రి ఈటలకు విజ్ఞప్తి చేశారు.
