Covid Booster dose: రేపటి(ఆదివారం ఏప్రిల్ 10) నుంచి 18 ఏళ్లు పైబడిన వారికి బూస్టర్ డోసు ఇవ్వనున్నట్లు రాష్ట్ర ఆరోగ్య శాఖ సంచాలకులు శ్రీనివాసరావు తెలిపారు. కేంద్ర ప్రభుత్వం ఆదేశాల ప్రకారం బూస్టర్ డోసు టీకా ఇచ్చేందుకు అన్ని ఏర్పాట్లు చేశామని.. రెండో టీకా తీసుకుని 9 నెలలు నిండిన వారు ఇందుకు అర్హులని ఆయన వెల్లడించారు. కరోనా విజృంభణ నేపథ్యంలో టీకా తీసుకోవడం కీలకమని ఆయన సూచించారు. ఒమిక్రాన్‌ వేరియంట్‌ అంతగా ప్రభావం చూపకపోవడానికి వ్యాక్సినేషనే కారణమన్నారు. అర్హులైన ప్రతి ఒక్కరూ టీకా తీసుకోవాలని కోరారు.
5కే రన్: హైదరాబాద్ నెక్లెస్ రోడ్లో జలవిహార్ వద్ద.. సీవీఆర్ కళాశాల సెన్సేషియా 'పీస్ రన్' పేరుతో నిర్వహించిన 5కే పరుగులో డీహెచ్ శ్రీనివాసరావు పాల్గొన్నారు. జెండా ఊపి పరుగు ప్రారంభించారు. దాదాపు 600 మంది విద్యార్థులు ఇందులో పాల్గొన్నారు. సే నో టూ డ్రగ్స్ ప్లకార్డులతో విద్యార్థులు పరుగు తీశారు. ప్రస్తుతం ఉన్న పరిస్థితుల్లో ప్రపంచ శాంతి ఎంతో ముఖ్యమని... శాంతి పేరుతో నిర్వహిస్తున్న ఈ పరుగు అభినందనీయమని డీహెచ్ అన్నారు. ఇలాంటి కార్యక్రమాలు విద్యార్ధులు, యువతలో ఐకమత్యాన్ని పెంపొందిస్తాయని అభిప్రాయపడ్డారు.
"కేంద్ర ప్రభుత్వ ఆదేశాల మేరకు 18 ఏళ్లు పైబడిన, రెండో డోసు తీసుకుని 9 నెలలు పూర్తయిన వారికి రేపటి నుంచి బూస్టర్ డోసు ప్రారంభమవుతుంది. మూడో దశలో కొవిడ్ ఉద్ధృతి తగ్గడానికి కారణం వ్యాక్సిన్ తీసుకోవడమే. కరోనా విజృంభణ నేపథ్యంలో టీకా తీసుకోవడం చాలా కీలకం. అర్హులైన ప్రతి ఒక్కరూ టీకా తీసుకోవాలి." -శ్రీనివాస రావు, డీహెచ్
ఇదీ చదవండి: 18+ వారందరికీ కరోనా టీకా బూస్టర్ డోస్- ఆదివారం నుంచే...
