వరంగల్, ఖమ్మం నగర పాలక సంస్థల ఎన్నికలకు కాంగ్రెస్ పార్టీ సమాయత్తమవుతోంది. పార్టీ పరంగా అనుసరించాల్సిన వ్యుహాలు, అభ్యర్థుల ఎంపిక తదితర అంశాలపై రాష్ట్ర వ్యవహారాల ఇన్ఛార్జి మాణిక్కం ఠాగూర్‌.. సీనియర్ నాయకులతో కలిసి గాంధీభవన్‌లో సమావేశం నిర్వహించారు. పీసీసీ అధ్యక్షుడు ఉత్తమ్‌కుమార్ రెడ్డి, ఎంపీలు కోమటిరెడ్డి వెంకట్ రెడ్డి, రేవంత్ రెడ్డి, సీల్పీ నేత భట్టి విక్రమార్క, ఎమ్మెల్యేలు, ఏఐసీసీ ఇన్ఛార్జి కార్యదర్శులు, పలువురు కార్పొరేషన్‌ పరిధిలోని నాయకులు ఈ సమావేశానికి హాజరయ్యారు.
జీహెచ్ఎంసీ ఎన్నికల ఫలితాలను దృష్టిలో ఉంచుకుని ఖమ్మం, వరంగల్ ఎన్నికల్లో మెరుగైన ఫలితాలు సాధించే అంశంపై ప్రధానంగా చర్చించినట్లు కాంగ్రెస్ వర్గాలు వెల్లడించాయి. ఎన్నికల షెడ్యూలు విడుదయ్యే సమయానికి అభ్యర్థుల ఎంపికపై కసరత్తు పూర్తి చేయాలని ఇన్ఛార్జి నిర్ణయించారు. స్థానిక సమస్యలను గుర్తించి వాటి పరిష్కారానికి ప్రభుత్వం చొరవచూపని వైనాన్ని ప్రజల వద్దకు తీసుకువెళ్లి ఓటర్లను ఆకర్షించేందుకు నాయకులు కృషి చేయాలని ఇన్ఛార్జి సూచించారు.
ఇదీ చదవండి: విద్యాసంస్థల పునఃప్రారంభంపై త్వరలోనే నిర్ణయం : మంత్రి హరీశ్
