"తలుచుకుంటే సాధించలేనిది ఏమి లేదని" నిరూపించింది భారత టేబుల్ టెన్నిస్ క్రీడాకారిణి భవీనాబెన్ పటేల్ (Bhavinaben Patel). తనను తానెప్పుడు దివ్యాంగురాలినని అనుకోలేదని తెలిపింది. పారాలింపిక్స్ టీటీ సెమీస్లో విజయానంతరం మీడియాతో మాట్లాడింది భవీనా.
"నన్ను నేను దివ్యాంగురాలినని ఎప్పుడు అనుకోలేదు. నేనేదైనా చేయగలననే ఆత్మవిశ్వాసం నాలో అన్నివేళలా ఉండేది. మేము (దివ్యాంగులు) వెనకబడి లేమని నేనిప్పటికే నిరూపించాను. పారా టేబుల్ టెన్నిస్ ఆట కూడా ఇతర క్రీడల వలే ముందుంది. చైనాతో పోటీపడాలంటే చాలా కష్టమని చాలా మంది చెబుతారు. నేను ఈ రోజు చైనా ప్యాడ్లర్పై విజయాన్ని సాధించాను. తలుచుకుంటే సాధించలేనిది ఏదీ లేదని నేను నిరూపించాను. మీరు కూడా అనుకుంటే ఏదైనా చేయొచ్చు.
-భవీనాబెన్ పటేల్, భారత టేబుల్ టెన్నిస్ క్రీడాకారిణి.
"రోజూ ఉదయం 4.00 గంటలకే నా ప్రణాళిక మొదలవుతుంది. మెడిటేషన్, యోగా చేస్తాను. ఎక్కువగా నిశ్శబ్దంగా ఉండటానికి ప్రయత్నిస్తాను. తొందరపాటులో మ్యాచ్ సందర్భంగా మనం చాలా తప్పులు చేస్తుంటాం. ఈ రోజు అలా జరగకుండా నన్ను నేను చాలా నియంత్రించుకున్నాను. నా విజయానికి దోహదపడిన కోచ్లు, సహాయ సిబ్బందికి ధన్యవాదములు" అని భవీనా పేర్కొంది.
"ఆటగాళ్లకు ఆర్థికంగా మద్దతు లభించనంత కాలం వారు చాలా వెనకబడతారు. మిడిల్ క్లాస్ కుటుంబాలకు ఇది చాలా పెద్ద విషయం. కానీ, సాయ్, టాప్స్, పీసీఐ, ప్రభుత్వం, ఓజీక్యూ, బ్లైండ్ పీపుల్స్ అసోసియేషన్, నా కుటుంబం.. ఈ విషయంలో చాలా మద్దతుగా నిలిచారు" అని టీటీ ప్లేయర్ తెలిపింది.
సెమీస్లో చైనా ప్లేయర్ మియావో జాంగ్తో పోటీ పడిన భవీనా.. ఆమెను 3-2తో చిత్తుచేసింది. గతంలో వీరిద్దరూ 11 సార్లు ముఖాముఖి తలపడ్డారు. ఇక ఆదివారం జరగనున్న ఫైనల్ పోరులో చైనా ప్లేయర్ యింగ్ ఝోతో పోరుకు సిద్ధం చేసింది.
ఇదీ చదవండి: Bhavina Patel: టీటీ ఫైనల్లో భవీనాబెన్.. స్వర్ణంపైనే గురి
