ఐపీఎల్లో ముంబయి ఇండియన్స్ జట్టు యజమాని నీతా అంబానీకి అరుదైన గౌరవం దక్కింది. 2020కి గాను టాప్ 10 స్పోర్ట్స్ ఉమెన్ జాబితాలో చోటు లభించింది. క్రీడా వాణిజ్య సంస్థ ఐస్పోర్ట్కనెక్ట్ ' ఇన్ఫ్ల్యూయెన్సియల్ ఉమన్ ఇన్ స్పోర్ట్స్ లిస్ట్ ఫర్ 2020 ' పేరుతో ఈ జాబితాను విడుదల చేసింది. మొదట 25మందిని ఎంపిక చేసి తుది జాబితాలో 10మందికి చోటు కల్పించారు.
భారత్లో అత్యంత సంపన్నుడు ముఖేశ్ అంబానీ సతీమణి నీతాతో పాటు ఈ జాబితాలో టెన్నిస్ స్టార్లు సెరేనా విలియమ్స్, నయోమి ఒసాకా ఉన్నారు. ప్రఖ్యాత జిమ్నాస్ట్ సిమోన్ బైల్స్, ఫుట్బాల్ క్రీడాకారిణి మేగన్ రేపినోకు స్థానం లభించింది.
ఫార్ములా వన్ మార్కెటింగ్ డైరెక్టర్ ఎల్లీ నోర్మన్, డబ్ల్యూఎన్బీఏ కమిషనర్ క్యాథీ ఎంగెల్బర్ట్, ఫిఫా ప్రధాన కార్యదర్శి ఫట్మా సమౌరా, స్పెషల్ ఒలింపిక్స్ సీఈఓ మేరీ డేవిస్, ఇంగ్లాంగ్ క్రికెట్ బోర్డు(మహిళలు) మేనేజింగ్ డైరెక్టర్ క్లేర్ కాన్నర్లు టాప్ 10 జాబితాలో ఉన్నారు.
ఐపీఎల్లో నాలుగు సార్లు టైటిల్ గెలిచి, అత్యంత విజయవంతమైన జట్టుగా గుర్తింపు పొందిన ముంబయి ఇండియన్స్ను ముందుండి నడిపిస్తున్నారు నీతా. దేశంలోని ఇతర క్రీడా ప్రాజెక్టులలోనూ పాల్గొంటున్నారు. 2014 నుంచి రిలయన్స్ ఇండస్ట్రీస్ బోర్డులో కీలకంగా వ్యవహరిస్తున్నారు.
మొదటగా రూపొందించిన 25మంది జాబితాలో భారత టెన్నిస్ దిగ్గజం సానియా మీర్జా, మహిళా టీమిండియా సారథి మిథాలీ రాజ్ ఉన్నట్లు ఐస్పోర్ట్కనెక్ట్ తెలిపింది.
