Yuzvendra Chahal Comments On MS Dhoni : టీమ్ఇండియా స్టార్ బౌలర్ యుజ్వేంద్ర చాహల్.. భారత మాజీ కెప్టెన్ ఎమ్ఎస్ ధోనీపై ఆసక్తికర వ్యాఖ్యలు చేశాడు. ధోనీ కెప్టెన్గా ఎంత కూల్‌గా ఉంటాడో.. సహచర ఆటగాళ్లతోనూ అదే విధంగా సరదాగా ఉంటాడని అన్నాడు. అందుకే ఇతర జట్లలోని ఆటగాళ్లు కూడా మహీని ఆరాధిస్తారని తెలిపాడు. మహీ కూడా అవకాశం దొరికినప్పుడల్లా.. వారి ఆటను మెరుగుపరచుకోవడంలో సూచనలు, సలహాలు ఇస్తుంటాడని పేర్కొన్నాడు. ధోనీ కెప్టెన్సీలో మంచి స్పిన్నర్గా ఎదిగిన యుజ్వేంద్ర చాహల్.. మహీతో ఉన్న అనుబంధాన్ని గుర్తుచేసుకున్నాడు.
అయితే, ఆన్‌ ఫీల్డ్‌, ఆఫ్‌ ఫీల్డ్‌లో తన చిలిపి చేష్టలతో సహచరులను ఆటపట్టించే చాహల్.. ధోనీ ఎదురుపడితే మాత్రం సైలెంట్ అయిపోతాడట. ఈ విషయాన్ని స్వయంగా చాహల్ ఓ ఇంటర్వ్యూలో వెల్లడించాడు. 'కేవలం ధోనీ ముందు మాత్రమే సైలెంట్గా ఉంటాను. అతడు నా ముందుకు వస్తే.. నా నోరు ఆటోమేటిక్గా మూతపడుతుంది. ఆ సమయంలో అనవసర విషయాలు మాట్లాడను. మహీ భాయ్‌ ముందు సైలెంట్గా కూర్చుని.. అతడు అడిగిన వాటికి మాత్రమే సమాధానం చెబుతాను. లేకపోతే అలా సైలెంట్గా ఉండిపోతాను' అని చాహల్ చెప్పుకొచ్చాడు.
'గతంలో సెంచూరియన్‌లో సౌతాఫ్రికాతో జరిగిన టీ20 మ్యాచ్‌లో నాలుగు ఓవర్లు వేసి 64 పరుగులు సమర్పించుకున్నాను. హెన్రిక్‌ క్లాసెన్‌ నా బౌలింగ్‌లో దంచికొట్టాడు. ఆ తర్వాత ధోనీ నా వద్దకు వచ్చి రౌండ్‌ ది వికెట్‌ వేస్తావా.. అని అడిగాడు. నేను అలానే వేశాను. ఆ బంతిని కూడా క్లాసెన్‌ సిక్స్‌ బాదాడు. మళ్లీ మహీ నా వద్దకు వచ్చి.. 'ఈరోజు నీది కాదు.. అయినా ఫర్వాలేదు' అంటూ నా భుజం తట్టాడు. 'మిగిలిన ఐదు బంతుల్లో బౌండరీలు ఇవ్వకుండా చూసుకో.. అది జట్టుకు ఉపయోగపడుతుంది' అని చెప్పాడు. అప్పుడు తెలిసింది.. నాది కాని రోజున కూడా నాకు జట్టు నుంచి మద్దతు లభిస్తుంది అని' అంటూ ధోనీ సారథ్యంపై పొగడ్తల వర్షం కురిపించాడు.
2016లో జింబాబ్వేతో జరిగిన వన్డే సిరీస్‌లో అంతర్జాతీయ క్రికెట్లో చాహల్ అరంగేట్రం చేశాడు. ఆటతో పాటు తన చిలిపి చేష్టలతో ప్రేక్షకులను అలరించే చాహల్.. ఇప్పటి వరకూ 72 వన్డేలు ఆడి 121 వికెట్లు పడగొట్టాడు. 75 టీ20 మ్యాచ్లు ఆడి 91 వికెట్లు పడగొట్టాడు. ఇండియన్ ప్రీమియర్ లీగ్- ఐపీఎల్‌లోనూ అద్భుతంగా రాణిస్తున్నాడు.
