టీమ్‌ఇండియా దిగ్గజం రాహుల్ ద్రవిడ్ అండర్-19, భారత్-ఏ కోచ్గానే కొనసాగాలని మాజీ క్రికెటర్ వసీమ్ జాఫర్ అంటున్నాడు. జాతీయ క్రికెట్‌ అకాడమీ చీఫ్‌గా ఆయన రిజర్వు బెంచ్‌ను పటిష్ఠం చేయడమే మంచిదని పేర్కొన్నాడు. అంతర్జాతీయ స్టార్ల కన్నా కుర్రాళ్లకే ఆయన మార్గనిర్దేశం అవసరమని అభిప్రాయపడ్డాడు. ఈ అభిప్రాయాన్ని తన యూట్యూబ్‌ ఛానల్‌లో వెల్లడించాడు.
"రాహుల్ ద్రవిడ్‌కు ఇంతకన్నా ఎక్కువ ఘనతే దక్కాలి. ఎన్‌సీయే ప్రధాన కోచ్గా ఆయన పనితీరు అద్భుతం. అండర్-19, భారత్-ఏ, గాయపడి ఎన్‌సీయేకు వెళ్లిన అంతర్జాతీయ ఆటగాళ్లకు ఆయన మార్గనిర్దేశం చేస్తాడు. వారికి అంతకు మించిన ఆదర్శనీయుడు ఎవరూ దొరకరు"అని జాఫర్ అన్నాడు.
ఆయన మార్గనిర్దేశం అవసరం..
శ్రీలంకలో పర్యటిస్తున్న భారత జట్టుకు ద్రవిడ్ కోచ్గా వెళ్లాడు. ఈ సిరీసుతో కుర్రాళ్లు తప్పక ప్రయోజనం పొందుతారు. అయితే ఒక అంతర్జాతీయ జట్టుకు కోచ్గా ఆయన తనకు తానుగా వెళ్లొద్దని నా అభిప్రాయం. అండర్-19, ఎన్‌సీయేకు వచ్చే క్రికెటర్లకు ఆయన అవసరం ఎంతైనా ఉంది. ఇప్పటికే టీమ్‌ఇండియాకు ఆడుతున్న వారు ఎదిగారు. అండర్-19, భారత్-ఏ క్రికెటర్లు తర్వాతి స్థాయికి ఎదిగేందుకు ఆయన మార్గనిర్దేశం అవసరం’ అని వసీమ్ అన్నాడు.
లంక పర్యటనకు ఎంపికైన క్రికెటర్లకు జాఫర్ శుభాకాంక్షలు తెలియజేశాడు.
ఇదీ చదవండి : 'టీమ్ ఇండియా నెక్స్ట్ కోచ్గా అతడే బెస్ట్'!
