Quinton De Kock Retirement: దక్షిణాఫ్రికా క్రికెటర్ క్వింటన్ డికాక్ టెస్టు కెరీర్కు గుడ్బై చెప్పాడు. భారత్తో జరిగిన టెస్టు మ్యాచ్ ముగిసిన తర్వాత డికాక్ తన రిటైర్మెంట్ను ప్రకటించాడు. కుటుంబంతో సమయం గడిపేందుకే తాను ఈ నిర్ణయం తీసుకున్నట్లు వెల్లడించాడు ఈ సఫారీ వికెట్ కీపర్ బ్యాట్స్మెన్. 29 ఏళ్లకే డికాక్ టెస్టుల నుంచి తప్పుకోవడం గమనార్హం.
"బాగా ఆలోచించే నేను ఈ నిర్ణయం తీసుకున్నాను. టెస్టుల నుంచి తప్పుకున్నాక భవిష్యత్తుపై కూడా ఆలోచించాను. నా భార్య సాషా, నేను త్వరలోనే తల్లిదండ్రులం కాబోతున్నాము. ఈ నేపథ్యంలో ఇకపై కుటుంబంతో ఎక్కువ సమయం గడపడం ప్రధానమని భావించాను. అందుకే టెస్ట్ క్రికెట్ నుంచి తప్పుకోవాల్సి వచ్చింది."
-క్వింటన్ డికాక్, దక్షిణాఫ్రికా క్రికెటర్
ఈ సందర్భంగా తన టెస్ట్ కెరీర్కు అండగా నిలిచిన కోచ్లు, టీమ్మేట్స్, మేనేజ్మెంట్ సహా స్నేహితులు, కుటుంబసభ్యులకు ధన్యవాదాలు చెప్పుకున్నాడు డికాక్.
ఇది ముగింపు కాదు..
టెస్టుల నుంచి తప్పుకున్నంత మాత్రాన క్రికెట్కు స్వస్తి పలికినట్లు కాదన్నాడు డికాక్. పరిమిత ఓవర్ల క్రికెట్లో దేశానికి ప్రాతినిధ్యం వహిచేందుకు సిద్ధంగా ఉన్నానని పేర్కొన్నాడు.
మొత్తం 54 టెస్ట్ మ్యాచ్లు ఆడిన క్వింటన్.. 38.82 సగటున 3,300 పరుగులు చేశాడు. ఇందులో ఆరు సెంచరీలు ఉన్నాయి. సఫారీ జట్టుకు కొన్నాళ్లు టెస్ట్ కెప్టెన్గా కూడా బాధ్యతలు చేపట్టాడు.
ఇదీ చూడండి : దక్షిణాఫ్రికాపై గెలుపు.. టీమ్ఇండియా ఖాతాలో పలు రికార్డులు
